សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចុះហត្ថលេខាលើអនុក្រឹត្យលេខ ២០៥ អនក្រ.បក និងលេខ ២០៦ អនក្រ.បក ចុះថ្ងៃទី២៥ ខែកញ្ញា ឆ្នាំ២០២៦ ដោយអនុញ្ញាតឱ្យធនាគារជាតិនៃកម្ពុជា ចេញផ្សាយ ធ្វើចរាចរ និងប្រើប្រាស់នូវធនប័ត្រគំរូថ្មីចំនួនពីរប្រភេទ រួមមានប្រភេទ ៥០,០០០ (ប្រាំម៉ឺន) រៀល និង ១០០,០០០ (មួយសែន) រៀល ក្នុងទូទាំងព្រះរាជាណាចក្រកម្ពុជា។
ការដាក់ឱ្យប្រើប្រាស់ធនប័ត្រគំរូថ្មីទាំងពីរប្រភេទនេះ ត្រូវបានអនុវត្តទន្ទឹមគ្នានឹងបណ្តាប្រភេទប្រាក់ដែលត្រូវបានចេញផ្សាយរួចហើយកន្លងមក ដែលមានន័យថារាល់ក្រដាសប្រាក់គំរូចាស់ៗដែលកំពុងចរាចរលើទីផ្សារនាពេលបច្ចុប្បន្ន នៅតែរក្សាតម្លៃ និងមានសុពលភាពចាយវាយស្របច្បាប់ជាធម្មតា។
ផ្អែកតាមសេចក្តីប្រកាសរបស់ធនាគារជាតិនៃកម្ពុជា ដែលចុះហត្ថលេខាដោយលោកជំទាវបណ្ឌិត ជា សិរី ទេសាភិបាលធនាគារជាតិ បានបញ្ជាក់ថា ធនប័ត្រប្រភេទ ៥០,០០០ រៀល គំរូថ្មី មានទំហំបណ្តោយ ១៥៥ មីលីម៉ែត្រ និងទទឹង ៧២ មីលីម៉ែត្រ ដោយមានពណ៌ចម្បងគឺពណ៌ស្លាទុំ និងពណ៌ត្នោត។
នៅលើផ្ទៃខាងមុខ ផ្នែកកណ្តាលខាងស្តាំត្រូវបានរំលេចឡើងនូវព្រះឆាយាល័ក្ខណ៍មើលពីមុខបញ្ឆិតចំហៀងខាងឆ្វេងនៃព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ អមដោយលេខ «៥០០០០» នៅផ្នែកខាងឆ្វេង ហត្ថលេខារបស់ទេសាភិបាល និងអគ្គបេឡា រូបជើងពានទ្រព្រះខ័នព័ទ្ធដោយកម្រងផ្កា និងក្បាច់ភ្ញីទេស ព្រមទាំងមានលេខ-មាលាទឹកថ្នាំខ្មៅ រូបចម្លាក់នាគក្បាល៧ តាមគំរូថ្មនៅប្រាសាទបាលិលេយ្យ និងខ្សែសុវត្ថិភាពទំហំ ១,២ មីលីម៉ែត្រ កាត់ទទឹងក្រដាសប្រាក់ពីលើដល់ក្រោម។
បន្ថែមពីនេះ នៅផ្នែកខាងឆ្វេងនៃផ្ទៃមុខ ក៏មានលេខ «50000» ព្រាលៗបោះពុម្ពបញ្ឈរ និមិត្តសញ្ញាពិសេសសម្រាប់ជនពិការភ្នែក និងបន្ទះ Hologram ទំហំ ១០ មីលីម៉ែត្រ ប្រកបដោយបច្ចេកវិទ្យាទំនើប។ រីឯផ្ទៃខាងខ្នងវិញ ផ្នែកកណ្តាលបង្ហាញពីរូបភាពប្រាសាទបាគងនៃក្រុមប្រាសាទរលួស ក្នុងខេត្តសៀមរាប ផ្នែកខាងស្តាំមានរូបភាពកូនដំរីតាមគំរូចម្លាក់ថ្មនៅប្រាសាទកោះកេរ ខេត្តព្រះវិហារ និងផ្នែកខាងឆ្វេងមានអក្សរ «ធនាគារជាតិនៃកម្ពុជា» ព្រមទាំងអក្សរឡាតាំង «NATIONAL BANK OF CAMBODIA» ចម្លាក់នាគមួយគូ និងលេខឆ្នាំ «2026» នៅផ្នែកខាងក្រោម។
ដោយឡែក ចំពោះធនប័ត្រប្រភេទ ១០០,០០០ រៀល គំរូថ្មីវិញ ត្រូវបានរចនាឡើងដោយមានទំហំបណ្តោយ ១៧០ មីលីម៉ែត្រ និងទទឹង ៧៥ មីលីម៉ែត្រ ព្រមទាំងមានពណ៌ចម្បងគឺពណ៌បៃតង និងពណ៌ប្រផេះ។ នៅផ្ទៃខាងមុខ ផ្នែកកណ្តាលខាងស្តាំរំលេចនូវព្រះឆាយាល័ក្ខណ៍នៃព្រះករុណា ព្រះបរមរតនកោដ្ឋ និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ដោយមានលេខ «១០០០០០» ហត្ថលេខាថ្នាក់ដឹកនាំធនាគារជាតិ រូបព្រះសង្ហារនៃព្រះរាជាណាចក្រកម្ពុជា រូបចម្លាក់នាគក្បាល៩ អក្សរ «មួយសែនរៀល» ព្រមទាំងបន្ទះ Hologram ទំហំ ១០ មីលីម៉ែត្រ និងនិមិត្តសញ្ញាសម្រាប់ជនពិការភ្នែកដូចគ្នាផងដែរ។
ចំណែកឯផ្ទៃខាងខ្នង ផ្នែកកណ្តាលបានរំលេចនូវព្រះឆាយាល័ក្ខណ៍រួមគ្នានៃអង្គក្សត្រទាំងបីព្រះអង្គ គឺព្រះករុណា ព្រះបរមរតនកោដ្ឋ សម្តេចព្រះវររាជមាតាជាតិខ្មែរ និងព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា អមដោយរូបភាពស្តេចគ្រុឌឈរសម្ដែងឫទ្ធិ តាមគំរូថ្មនៅប្រាសាទព្រះខ័ន ខេត្តសៀមរាប នៅផ្នែកខាងស្តាំ និងមានឈ្មោះស្ថាប័នជាភាសាខ្មែរ-អង់គ្លេស រួមជាមួយលេខឆ្នាំ «2026» នៅផ្នែកខាងឆ្វេង។
ធនាគារជាតិនៃកម្ពុជា បានបញ្ជាក់ថា ការចេញផ្សាយធនប័ត្រគំរូថ្មីនេះ គឺដើម្បីលើកកម្ពស់គុណភាព និងសុវត្ថិភាពរូបិយវត្ថុជាតិ ព្រមទាំងបានអំពាវនាវដល់សាធារណជនទាំងអស់ ឱ្យយកចិត្តទុកដាក់ពិនិត្យ និងសម្គាល់នូវលក្ខណៈសម្គាល់ផ្លូវការទាំងនេះឱ្យបានច្បាស់លាស់ ដើម្បីធានានូវភាពត្រឹមត្រូវ និងជៀសវាងការភាន់ច្រឡំផ្សេងៗក្នុងការទូទាត់សាច់ប្រាក់ប្រចាំថ្ងៃ៕
