រាជធានីភ្នំពេញ, ថ្ងៃទី០១ ខែតុលា ឆ្នាំ២០២៦ — ក្រុមហ៊ុន បុរី វិមានសំណាង ម.ក ដោយសហការជាមួយក្រុមហ៊ុនមូលបត្រ កម្ពុ ម.ក ដែលជាទីប្រឹក្សាមូលបត្រ និងជាអ្នកធានាទិញមូលបត្រ មានកិត្តិយសយ៉ាងខ្ពង់ខ្ពស់ក្នុងការជម្រាបជូនសាធារណជន និងវិនិយោគិនទាំងអស់អំពីជោគជ័យដ៏ត្រចះត្រចង់នៃការធ្វើបរិវិសកម្មមូលបត្រកម្មសិទ្ធិ (IPO) របស់ខ្លួន។
ផ្អែកលើការរៀបចំដំណើរការបរិវិសកម្មចាប់ពីថ្ងៃទី០២ ខែកក្កដា ឆ្នាំ២០២៦ ដល់ថ្ងៃទី១៥ ខែកញ្ញា ឆ្នាំ២០២៦ ភាគហ៊ុនសរុបចំនួន ២១,៦៤០,៣៦០ ភាគហ៊ុន ត្រូវបានវិនិយោគិនទិញ និងធ្វើបរិវិសកម្មបានជោគជ័យទាំងស្រុង។ លទ្ធផលផ្លូវការនៃការធ្វើបរិវិសកម្មនេះ ត្រូវបានអនុម័ត និងទទួលស្គាល់ជាផ្លូវការដោយ និយ័តករមូលបត្រកម្ពុជា (ន.ម.ក.) យោងតាមលិខិតអនុញ្ញាតលេខ ២៩៦៤/២៦ ន.ម.ក. ចុះថ្ងៃទី៣០ ខែកញ្ញា ឆ្នាំ២០២៦។
ព្រឹត្តិការណ៍នេះគឺជាការបោះជំហានប្រវត្តិសាស្ត្រមួយនៅក្នុងវិស័យអចលនទ្រព្យ និងផ្សារមូលបត្រកម្ពុជា ដោយ បុរី វិមានសំណាង ម.ក នឹងក្លាយជា «បុរីដំបូងគេបង្អស់» ដែលត្រូវចុះបញ្ជីលក់ភាគហ៊ុនជាសាធារណៈនៅផ្សារមូលបត្រកម្ពុជា (CSX) ហើយក៏ជាក្រុមហ៊ុនដំបូងគេដែលសម្រេចបានការបោះផ្សាយលក់មូលបត្រកម្មសិទ្ធិជាសាធារណៈលើកដំបូង (IPO) នៅក្នុងឆ្នាំ២០២៦ នេះផងដែរ។
តំណាងក្រុមហ៊ុន បុរី វិមានសំណាង ម.ក និង ក្រុមហ៊ុនមូលបត្រ កម្ពុ ម.ក បានសម្តែងនូវគារវភក្តី និងសេចក្តីថ្លែងអំណរគុណយ៉ាងជ្រាលជ្រៅបំផុតជូនចំពោះ និយ័តករមូលបត្រកម្ពុជា (ន.ម.ក.), ផ្សារមូលបត្រកម្ពុជា (CSX), ក្រុមអ្នកប្រឹក្សាយោបល់ជំនាញទាំងអស់នៃក្រុមការងារ IPO ព្រមទាំងភាគីពាក់ព័ន្ធ និងវិនិយោគិនទាំងអស់ ដែលបានផ្តល់ទំនុកចិត្ត ការគាំទ្រយ៉ាងមុតមាំ និងការចូលរួមចំណែកយ៉ាងសកម្ម ដែលធ្វើឱ្យដំណើរការបរិវិសកម្មនេះទទួលបានជោគជ័យយ៉ាងត្រចះត្រចង់។ ក្រុមហ៊ុនទាំងពីរទន្ទឹងរង់ចាំការបន្តកិច្ចសហប្រតិបត្តិការ និងការគាំទ្រយ៉ាងជិតស្និទ្ធពីគ្រប់ភាគីសម្រាប់ជំហានបន្ទាប់។
ចំពោះកាលបរិច្ឆេទផ្លូវការនៃ «ពិធីចុះបញ្ជី និងបើកការជួញដូរភាគហ៊ុនជាផ្លូវការ» របស់ ក្រុមហ៊ុន បុរី វិមានសំណាង ម.ក នៅលើផ្សារមូលបត្រកម្ពុជា នឹងត្រូវប្រកាសជូនសាធារណជន និងវិនិយោគិនជ្រាបនាពេលឆាប់ៗខាងមុខនេះ ដោយក្រុមហ៊ុនមូលបត្រ កម្ពុ ម.ក បន្ទាប់ពីទទួលបានការអនុម័តចុងក្រោយពី ផ្សារមូលបត្រកម្ពុជា។
អំពី បុរី វិមានសំណាង ម.ក បុរី វិមានសំណាង ម.ក គឺជាក្រុមហ៊ុនអភិវឌ្ឍន៍អចលនទ្រព្យឈានមុខគេមួយនៅកម្ពុជា ដែលផ្តោតលើការកសាងលំនៅឋានប្រណីត បែបក្លាសិក និងទំនើប ប្រកបដោយគុណភាព សោភ័ណភាព និងស្តង់ដាររស់នៅខ្ពស់។ ក្រុមហ៊ុនបាន និងកំពុងពង្រីកវិសាលភាពរបស់ខ្លួនដើម្បីបង្កើតតម្លៃបន្ថែមជូនដល់អតិថិជន និងភាគទុនិក តាមរយៈការគ្រប់គ្រងប្រកបដោយតម្លាភាព និងអភិបាលកិច្ចល្អ។
