អធិការបតីអាល្លឺម៉ង់ លោក Friedrich Merz បានប្រកាសកញ្ចប់ជំនួយបន្ថែមចំនួន ១,៥ពាន់លានដុល្លារ សម្រាប់ប្រទេសអ៊ុយក្រែន ដោយផ្តោតលើអាវុធការពារដែនអាកាស និងគ្រឿងបរិក្ខារអគ្គិសនី ដើម្បីទប់ទល់នឹងការវាយប្រហារតាមអាកាសរបស់រុស្ស៊ី។ នេះបើតាមការចុះផ្សាយពីសារព័ត៌មាន The Guardian។
កញ្ចប់ជំនួយថ្មីនេះផងដែរ ត្រូវបានធ្វើឡើង ក្នុងអំឡុងពេលទស្សនកិច្ចភ្លាមៗដោយមិនបានប្រកាសមុន របស់លោក Merz ទៅកាន់ទីក្រុងគៀវ (Kyiv) ដើម្បីបង្ហាញពីការគាំទ្រចំពោះអ៊ុយក្រែន។ លោក Merz បានថ្លែងនៅក្នុងសន្និសីទសារព័ត៌មានរួមគ្នាជាមួយប្រធានាធិបតីអ៊ុយក្រែន លោក Volodymyr Zelensky កាលពីថ្ងៃទី៤ ខែតុលា នៅទីក្រុងគៀវថា៖ “កញ្ចប់ជំនួយដែលត្រូវការជាចាំបាច់នេះ នឹងជួយពង្រឹងប្រព័ន្ធការពារដែនអាកាសរបស់អ៊ុយក្រែនយ៉ាងឆាប់រហ័ស និងគួរឱ្យកត់សម្គាល់”។
គួរឲ្យដឹងផងដែរថាកញ្ចប់នេះរួមមានជំនួយយោធាចំនួន ១ពាន់លានអឺរ៉ូ (១,១៣ពាន់លានដុល្លារ) រួមទាំងថវិកាផ្សេងទៀតសម្រាប់ផលិតដ្រូនស្ទាក់ចាប់ (interceptor UAVs) ដែលមានសមត្ថភាពទប់ទល់នឹងអាវុធយន្តហោះចម្បាំងរបស់រុស្ស៊ី។ ប្រទេសអាល្លឺម៉ង់ក៏នឹងផ្គត់ផ្គង់មីស៊ីលរាប់ពាន់គ្រាប់សម្រាប់ប្រព័ន្ធការពារដែនអាកាស IRIS-T ដែលផលិតក្នុងស្រុករបស់ខ្លួន ព្រមទាំងប្រគល់ប្រព័ន្ធបាញ់មីស៊ីល IRIS-T បន្ថែមទៀតទៅឱ្យអ៊ុយក្រែនផងដែរ។
លើសពីនេះ អធិការបតីអាល្លឺម៉ង់ក៏បានប្រកាសពីជំនួយផ្នែកថាមពលប្រមាណ ៣៥០លានអឺរ៉ូ (៣៩៤លានដុល្លារ) សម្រាប់អ៊ុយក្រែនផងដែរ ដោយផ្តោតលើម៉ាស៊ីនភ្លើង និងការជួសជុលហេដ្ឋារចនាសម្ព័ន្ធដែលបានខូចខាតដោយសារការវាយប្រហាររបស់រុស្ស៊ី។
ជម្រាបជូនថា អាល្លឺម៉ង់គឺជាអ្នកគាំទ្រដ៏រឹងមាំបំផុតមួយរបស់អ៊ុយក្រែន។ កាលពីសប្តាហ៍មុន អធិការបតី Merz ក៏បានអំពាវនាវឱ្យមានឯកភាពគ្នានៅក្នុងអង្គការ NATO អឺរ៉ុប និងនៅក្នុងប្រទេសរបស់លោក ចំពេលមានការកើនឡើងនៃឥទ្ធិពលគណបក្សស្តាំនិយមជ្រុល AfD ដែលស្និទ្ធនឹងប្រទេសរុស្ស៊ី បន្ទាប់ពីការបោះឆ្នោតនៅតាមរដ្ឋនីមួយៗផងដែរ៕
