សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅថ្ងៃទី៧ ខែតុលា ឆ្នាំ២០២៦ បានអញ្ជើញអរសាទរខួបលើកទី៨០ឆ្នាំ នៃថ្ងៃបង្កើតសាកលវិទ្យាល័យវិទ្យាសាស្ត្រសុខាភិបាល និងចូលរួមសម្ពោធអគារសិក្សាថ្មី ២ នៃសាកលវិទ្យាល័យវិទ្យាសាស្ត្រសុខាភិបាល និងប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យវិទ្យាសាស្ត្រសុខាភិបាល។
នាឱកាសនោះ សម្តេចធិបតី ហ៊ុន ម៉ាណេត បានបញ្ជាក់ថា សាកលវិទ្យាល័យវិទ្យាសាស្រ្តសុខាភិបាល ត្រូវបានបង្កើតឡើងនៅឆ្នាំ ១៩៤៦ ដំបូងមានឈ្មោះថា “សាលាមន្រ្តីសុខាភិបាល” ហើយបានវិវត្ត និងប្តូរឈ្មោះជាបន្តបន្ទាប់។ ក្រោយពីត្រូវបានបោះបង់ចោលក្នុងរបប ប៉ុល ពត ស្ថាប័ននេះបានបើកដំណើរការឡើងវិញនៅឆ្នាំ ១៩៨០ និងបានក្លាយជាសាកលវិទ្យាល័យវិទ្យាសាស្រ្តសុខាភិបាលនៅឆ្នាំ ១៩៩៧។
ជាមួយគ្នានេះ សម្តេចធិបតីថា នៅខែធ្នូ ឆ្នាំ ២០០១ សាកលវិទ្យាល័យបានក្លាយជាគ្រឹះស្ថានសាធារណៈរដ្ឋបាល ហើយបានបន្តអភិវឌ្ឍធនធានមនុស្ស ហេដ្ឋារចនាសម្ព័ន្ធ និងសម្ភារៈបរិក្ខារសិក្សា។ នៅឆ្នាំ ២០២៣ រាជរដ្ឋាភិបាលបានកែសម្រួលរចនាសម្ព័ន្ធសាកលវិទ្យាល័យ ដោយមាន ៩ អង្គភាព រួមមានមហាវិទ្យាល័យ៦ មន្ទីរពេទ្យសាកលវិទ្យាល័យ១ មជ្ឈមណ្ឌលស្រាវជ្រាវសុខភាពសាកល១ និងអង្គភាពកិច្ចការទូទៅ១។
សូមជម្រាបដែរថា គិតចាប់ពីឆ្នាំ ១៩៨០ ដល់ឆ្នាំ ២០២៦ សាកលវិទ្យាល័យបានបណ្តុះបណ្តាលធនធានមនុស្សក្នុងវិស័យសុខាភិបាលសរុប ៣៤ ៦៣៣ នាក់ ដែលក្នុងនោះមានថ្នាក់ដឹកនាំ មន្ត្រីរាជការ និងបុគ្គលិកជាច្រើននៃក្រសួងសុខាភិបាលផងដែរ។ សមិទ្ធផលនេះ បានបង្ហាញពីតួនាទីដ៏សំខាន់របស់សាកលវិទ្យាល័យវិទ្យាសាស្រ្តសុខាភិបាល ក្នុងការកសាង និងអភិវឌ្ឍធនធានមនុស្សសម្រាប់វិស័យសុខាភិបាល ដែលបាននិងកំពុងបម្រើការងារនៅតាមស្ថាប័នសុខាភិបាលទាំងនៅថ្នាក់ជាតិ និងថ្នាក់ក្រោមជាតិ និងជាកម្លាំងសំខាន់ក្នុងការពង្រឹងប្រព័ន្ធសុខាភិបាលសាធារណៈ កែលម្អគុណភាពសេវាសុខាភិបាល និងឆ្លើយតបទៅនឹងតម្រូវការរបស់ប្រជាពលរដ្ឋ ដែលស្របទៅនឹងការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា លើវិស័យសុខាភិបាល ជាពិសេសក្នុងនីតិកាលទី៧ នៃរដ្ឋសភា ដែលបានចាត់ទុកការលើកកម្ពស់សុខុមាលភាព និងការពង្រឹងប្រព័ន្ធសុខាភិបាល ជាអាទិភាពគន្លឹះ ក្នុងការអភិវឌ្ឍមូលធនមនុស្ស និងសង្គមជាតិ៕អត្ថបទ៖ហ្សាលីន
