អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប និងភរិយា បានព្យាបាលវះកាត់ជំងឺបេះដូងដោយជោគជ័យទាំងអស់គ្នា នៅប្រទេសសិង្ហបុរី និងត្រៀមចេញពីមន្ទីរពេទ្យ ត្រឡប់មកកម្ពុជាវិញនៅចុងសប្តាហ៍នេះ។
នៅលើបណ្តាញសង្គម នាថ្ងៃទី៣ ខែវិច្ឆិកា ឆ្នាំ២០២៦នេះ អ្នកឧកញ៉ាអគ្គនាយក បានបង្ហោះរូបភាពនៅមន្ទីរពេទ្យជាមួយកូនៗ ដោយលើកឡើងបែបនេះថា៖ “រូបខ្ញុំ និងភរិយាសុទ្ធតែមានជំងឺបេះដូងដូចគ្នា លោកវេជ្ជបណ្ឌិតតម្រូវឱ្យមកវះកាត់ព្យាបាលជាបន្ទាន់ ទើបនៅថ្ងៃអាទិត្យ ទី១ ខែវិច្ឆិកា ឆ្នាំ២០២៦ បានចេញដំណើរពីភ្នំពេញ ហើយថ្ងៃចន្ទ ទី២ ចូលមន្ទីរពេទ្យធ្វើការវះកាត់តំណាលគ្នា។ ថ្ងៃអង្គារ ទី៣ វេលាម៉ោង១១ព្រឹក ម៉ោងនៅសិង្ហបុរី ចេញពីមន្ទីរពេទ្យទាំងពីរនាក់ ការវះកាត់ព្យាបាលនេះទទួលបានជោគជ័យទាំងអស់គ្នា និងអាចវិលត្រឡប់ទៅមាតុភូមិយើងវិញចុងសប្ដាហ៍នេះហើយ”។
អ្នកឧកញ៉ា ម៉ុង ឫទ្ធី ក៏សូមថ្លែងអំណរគុណយ៉ាងខ្លាំង ចំពោះប្រិយមិត្តយើងទាំងអស់គ្នា ដែលតែងតែមានការព្រួយបារម្ភ ព្រមទាំងបានជូនពរដល់រូបលោកនិងភរិយា។
សូមជម្រាបថា អ្នកឧកញ៉ា ម៉ុង ឫទ្ធី ត្រូវបានគេស្គាល់ថា ជាអ្នកជំនួញជើងចាស់មួយរូបនៅកម្ពុជា លើវិស័យកសិឧស្សាហកម្ម រួមទាំងម្ចាស់ក្រុមហ៊ុនដាំដូងប្រេង រាប់ម៉ឺនហិកតា។ អ្នកឧកញ៉ា ក៏ជាម្ចាស់តំបន់កសិទេសចរណ៍ ម៉ុង ឫទ្ធី សែនជ័យ ជាកន្លែងទេសចរណ៍បង្កើតឡើងថ្មី មានផ្ទៃដីសរុបប្រមាណ ៥០០ហិកតា នៅខេត្តកំពង់ស្ពឺ ព្រមទាំងបច្ចុប្បន្នមានតួនាទីជាសមាជិកព្រឹទ្ធសភា ផងដែរ៕
