កំពង់ស្ពឺ៖ ក្នុងឱកាសគម្រប់ខួប១០ឆ្នាំនៃការវិនិយោគ និងប្រតិបត្តិការអាជីវកម្មនៅព្រះរាជាណាចក្រកម្ពុជា ក្រុមហ៊ុន Angkor Dairy Products Co., Ltd. ដែលជាក្រុមហ៊ុនផលិតទឹកដោះគោម៉ាក AngkorMilk បានបង្ហាញពីសមិទ្ធផលនៃការរួមចំណែកផ្នែកសេដ្ឋកិច្ច សង្គម និងផែនការពង្រីកការវិនិយោគនាពេលអនាគត តាមរយៈការរៀបចំពិធីសម្ពោធដាក់ឱ្យប្រើប្រាស់អគារសិក្សាដែលបានជួសជុលរួចរាល់ នៅសាលាបឋមសិក្សាតាំងរបង ក្នុងស្រុកឱរ៉ាល់ ខេត្តកំពង់ស្ពឺ។
ពិធីនេះមានការចូលរួមពី លោក ឈួន ឈុំ អភិបាលនៃគណៈអភិបាលរងស្រុកឱរ៉ាល់ លោក Ta Duy Tung អគ្គនាយកក្រុមហ៊ុន អង្គរ ឌែរី ប្រូដាក ខូ អិលធីឌី អាជ្ញាធរមូលដ្ឋាន តំណាងសហគមន៍ លោកគ្រូ អ្នកគ្រូ និងសិស្សានុសិស្ស។
ការសម្ពោធដាក់ឱ្យប្រើប្រាស់អគារសិក្សាដែលបានជួសជុលនេះ គឺជាផ្នែកមួយនៃយុទ្ធសាស្ត្រទំនួលខុសត្រូវសង្គមរបស់ក្រុមហ៊ុន ដែលផ្តោតលើការអភិវឌ្ឍធនធានមនុស្ស និងការគាំទ្រសហគមន៍មូលដ្ឋាន។ សកម្មភាពនេះក៏ជាការបង្ហាញពីការប្តេជ្ញាចិត្តរបស់ក្រុមហ៊ុនក្នុងការបង្កើតតម្លៃរួមរវាងការរីកចម្រើនអាជីវកម្ម និងការអភិវឌ្ឍសង្គមជាតិ។
ក្នុងរយៈពេល១០ឆ្នាំកន្លងមក AngkorMilk បានកសាងមូលដ្ឋានអាជីវកម្មនៅកម្ពុជាតាមរយៈការវិនិយោគលើរោងចក្រផលិតកម្ម ការបង្កើតឱកាសការងារ ការអភិវឌ្ឍជំនាញក្នុងស្រុក និងការពង្រីកបណ្តាញចែកចាយផលិតផល ទូទាំងប្រទេស។
យោងតាមទិន្នន័យដែលក្រុមហ៊ុនបានលើកឡើង AngkorMilk បានបង្កើតការងារដល់បុគ្គលិកជាង៦០០នាក់ និងគាំទ្រដល់អាជីវករជាង៥០,០០០នាក់ ក្នុងប្រព័ន្ធ និងក្រៅប្រព័ន្ធ រួមមានអ្នកចែកចាយបន្ត អ្នកលក់ដុំ និង អ្នកលក់រាយ។ ផលិតផលរបស់ក្រុមហ៊ុនមានអ្នកប្រើប្រាស់ចុងក្រោយប្រមាណជាង៣លាននាក់ក្នុងមួយឆ្នាំ។
បន្ថែមពីនេះ ក្រុមហ៊ុនបានរួមចំណែកបង់ពន្ធចូលថវិកាជាតិប្រមាណ៨២លានដុល្លារអាមេរិក ក្នុងរយៈពេល១០ឆ្នាំ ដែលជាការរួមចំណែកដល់ចំណូលថវិកាជាតិ និងការអភិវឌ្ឍសេដ្ឋកិច្ចសង្គមកម្ពុជា។
ចំពោះសមត្ថភាពផលិតកម្ម AngkorMilk មានរោងចក្រផលិតទឹកដោះគោនៅតំបន់សេដ្ឋកិច្ចពិសេសរ៉ូយ៉ាល់ភ្នំពេញ (RPPSEZ) ដែលប្រើប្រាស់គ្រឿងចក្រស្វ័យប្រវត្តិ និងបច្ចេកវិទ្យាទំនើបពីប្រទេសស៊ុយអែត អាល្លឺម៉ង់ អ៊ីតាលី និងសហរដ្ឋអាមេរិក។ រោងចក្រនេះអនុវត្តប្រព័ន្ធគ្រប់គ្រងគុណភាព និងសុវត្ថិភាពចំណីអាហារតាមស្តង់ដារ ISO, FSSC 22000, HACCP និង GMP។
ការវិនិយោគលើបច្ចេកវិទ្យា និងការអភិវឌ្ឍធនធានមនុស្សក្នុងស្រុក គឺជាផ្នែកសំខាន់នៃយុទ្ធសាស្ត្ររបស់ក្រុមហ៊ុនក្នុងការកសាងសមត្ថភាពផលិតកម្មប្រកបដោយគុណភាព និងស្តង់ដារខ្ពស់។ ក្នុងរយៈពេល១០ឆ្នាំនេះ បុគ្គលិកខ្មែរបានទទួលការអភិវឌ្ឍជំនាញ និងចំណេះដឹងបច្ចេកទេសក្នុងវិស័យផលិតផលទឹកដោះគោ ព្រមទាំងបទពិសោធន៍លើការគ្រប់គ្រងគុណភាព និងសុវត្ថិភាពចំណីអាហារ។
ទិសដៅវិនិយោគថ្មី៖ ពង្រឹងខ្សែច្រវាក់តម្លៃឧស្សាហកម្មទឹកដោះគោកម្ពុជា
សម្រាប់ជំហានបន្ទាប់ AngkorMilk បានបង្ហាញពីការប្តេជ្ញាចិត្តបន្តវិនិយោគនៅកម្ពុជា ដោយមានគោលដៅពង្រីកសមត្ថភាពអាជីវកម្ម បង្កើតឱកាសការងារថ្មី អភិវឌ្ឍជំនាញប្រជាពលរដ្ឋក្នុងស្រុក គាំទ្រវិស័យកសិកម្ម និងរួមចំណែកជំរុញកំណើនសេដ្ឋកិច្ចជាតិ។
គម្រោងវិនិយោគសំខាន់មួយដែលក្រុមហ៊ុនបានលើកឡើង គឺការវិនិយោគបន្ថែមលើកសិដ្ឋានចិញ្ចឹមគោយកទឹកដោះទំនើប ដែលមានស្តង់ដារខ្ពស់។ គម្រោងនេះមានគោលបំណងចូលរួមអភិវឌ្ឍសមត្ថភាពកសិករកម្ពុជា តាមរយៈការផ្តល់ឱកាសរៀនសូត្រ និងបណ្តុះបណ្តាលជំនាញពាក់ព័ន្ធនឹងការចិញ្ចឹមគោយកទឹកដោះ។
ក្នុងទស្សនៈរយៈពេលវែង ការអភិវឌ្ឍកសិដ្ឋានគោយកទឹកដោះក្នុងស្រុកអាចជួយពង្រឹងមូលដ្ឋានផលិតកម្មក្នុងស្រុក កាត់បន្ថយការពឹងផ្អែកលើការនាំចូលទឹកដោះគោ និងរួមចំណែកបង្កើតខ្សែច្រវាក់តម្លៃដែលភ្ជាប់រវាង វិស័យកសិកម្ម និងឧស្សាហកម្មកែច្នៃចំណីអាហារ។
ជាមួយគ្នានេះ ក្រុមហ៊ុនក៏បានបញ្ជាក់ពីការបន្តគាំទ្រវិស័យអប់រំ ការរួមចំណែកក្នុងការថែរក្សាបរិស្ថាន និងការលើកកម្ពស់សុខមាលភាពប្រជាជនកម្ពុជា។
ការផ្តល់ជូនអគារសិក្សាដែលបានជួសជុលរួចរាល់ដល់សាលាបឋមសិក្សាតាំងរបង ក្នុងឱកាសខួប១០ឆ្នាំនេះ គឺជាការបង្ហាញពីទស្សនៈវិស័យរបស់ AngkorMilk ដែលមើលឃើញថា ការវិនិយោគលើសង្គម និងការអប់រំ គឺជាផ្នែកមួយនៃការកសាងអនាគតប្រកបដោយចីរភាព។
AngkorMilk បញ្ជាក់ពីការបន្តបេសកកម្មក្នុងការផ្តល់ផលិតផលទឹកដោះគោដែលមានគុណភាព សុវត្ថិភាព និងអាហារូបត្ថម្ភល្អជូនប្រជាជនកម្ពុជា ព្រមទាំងបន្តចូលរួមចំណែកដល់ការអភិវឌ្ឍសេដ្ឋកិច្ច និងសង្គមជាតិ។
AngkorMilk ១០ឆ្នាំនៅកម្ពុជា៖ បន្តវិនិយោគ បន្តបង្កើតឱកាស និងបន្តរីកចម្រើនជាមួយកម្ពុជា។
