ប្រទេសនៅតំបន់អឺរ៉ុប និងលោកខាងលិចជាច្រើនកំពុងសម្រុកដាក់ទណ្ឌកម្មសេដ្ឋកិច្ច និងចាប់ផ្ដើមរឹបអូសទ្រព្យសម្បត្តិរបស់ក្រុមមហាសេដ្ឋីរុស្ស៊ីជាច្រើននាក់ ដែលកំពុងមានមុខជំនួញធំៗនៅទីនោះ។
ជាក់ស្ដែងកាលពីសប្ដាហ៍មុន រដ្ឋាភិបាលអាល្លឺម៉ង់ និងអ៊ីតាលីបានដកហូតនាវាផ្ទាល់ខ្លួនដែលស្ថិតក្រោមការគ្រប់គ្រងរបស់មហាសេដ្ឋីរុស្ស៊ីជាបន្តបន្ទាប់ ហើយដើម្បីគេចវេសពីការរឹបអូសទ្រព្យសម្បត្តិបែបនេះ ក្រុមអ្នកមានរុស្ស៊ីចាប់ផ្ដើមស្វែងរកទីតាំងសមស្របសម្រាប់ជម្លៀសសម្ភារៈនិយមរបស់ពួកគេ។
បើតាមការចុះផ្សាយពី Business Insider បានឲ្យដឹងក្រុមអ្នកមានរុស្ស៊ីចាប់ផ្ដើមយកនាវាផ្ទាល់ខ្លួន និងយន្តហោះផ្ទាល់ខ្លួនរបស់ពួកគេទៅរក្សាទុក និងចតចោលនៅតំបន់ Dubai និងប្រជុំកោះ Maldives ដែលជាទីតាំងអព្យាក្រឹត្យ។
បន្ថែមពីនោះ The Times បានឲ្យដឹងទៀតថា នាវាផ្ទាល់ខ្លួនរបស់អ្នកនយោបាយរុស្ស៊ីម្នាក់ និងនាវ ៣ ផ្សេងទៀតរបស់មហាសេដ្ឋីរុស្ស៊ីបានចតចោលនៅតំបន់ Dubai តាំងពីថ្ងៃទី ០១ មីនាមកម៉្លេះ ស្របពេលយន្តហោះផ្ទាល់ខ្លួនរបស់អ្នកជំនួញ Arkady Rotenberg ក៏ចតទុកនៅទីនោះដូចគ្នា។
ដោយឡែក Marine Traffic Channel បានបង្ហើបឲ្យដឹងដែរថា នាវា ៣ របស់មហាសេដ្ឋីរុស្ស៊ីឯទៀតកំពុងធ្វើដំណើរទៅកាន់ប្រជុំកោះ Maldives ដែលមិនជាប់ពាក់ព័ន្ធជាមួយសហរដ្ឋអាមេរិក និង Montenegro។
បញ្ជាក់ដែរថា គិតត្រឹមថ្ងៃនេះ ចក្រភពអង់គ្លេសបានដាក់ឈ្មោះមហាសេដ្ឋីរុស្ស៊ី ៧ នាក់ក្នុងបញ្ជីទណ្ឌកម្មសេដ្ឋកិច្ចដែលរួមមាន Roman Abramovich ដែលធ្លាប់សន្យាថា នឹងលក់ក្លឹបបាល់ទាត់ Chelsea យកថវិកាទាំងនោះទៅជួយដល់ប្រជាជនអ៊ុយក្រែនផងដែរ៕
ប្រភព: pagalparrot
