បន្ទាប់បើកការដ្ឋានសាងសង់កាលឆ្នាំ២០១៨ គិតទល់នឹងចុងខែមិន ឆ្នាំ២០២២នេះ ស្ពានអាកាសនិងផ្លូវក្រោមដី រង្វង់មូលចោមចៅ បានសាងសង់រួចរាល់១០០ភាគរយហើយ ដោយគ្រោងនឹងបើកសម្ពោធជាផ្លូវការ នាថ្ងៃទី៣១ ខែមីនា ឆ្នាំ២០២២ស្អែកនេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
ក្នុងដំណើរចុះពិនិត្យមើលស្ថានភាពជាក់ស្តែងនៅទីតាំងត្រៀមប្រារព្ធពិធីសម្ពោធជាផ្លូវការកាល រសៀលថ្ងៃទី២៩ មីនា លោក ឃួង ស្រេង អភិបាលរាជធានីភ្នំពេញ បានបង្ហាញក្តីរំពឹងថា ស្ពានអាកាស និងផ្លូវក្រោមដី ចំណុចរង្វង់មូលចោមចៅនេះ នឹងអាចជួយដោះស្រាយបញ្ហាកកស្ទះចរាចរណ៍ដែលតែងកើតមានឡើងនៅចំណុចរង្វង់មូលចោមចៅដែលជាផ្លូវសេដ្ឋកិច្ចដ៏សំខាន់សម្រាប់ការដឹកជញ្ជូនឆ្ពោះទៅផ្លូវជាតិលេខ៣ និងផ្លូវជាតិលេខ៤ ទៅខេត្តមានកំពង់ផែសមុទ្រទឹកជ្រៅនៅកម្ពុជា ក្នុងការផ្លាស់ប្តូរទំនិញចេញចូលក្នុង និងក្រៅប្រទេសផងដែរ។
គួររម្លឹកថា ពាក់ព័ន្ធនិងពិធីបើកសម្ភោធដាក់ឱ្យប្រើប្រាស់ជាផ្លូវការស្ពានអាកាស និងផ្លូវក្រោមដីចោមចៅ នេះ រដ្ឋបាលរាជធានីភ្នំពេញក៏បានចេញសេចក្តីជូនដំណឹងមួយដើម្បីអោយប្រជាពលរដ្ឋបញ្ចៀសចរាចរ និងផ្អាកចរាចរជាបណ្តោះ ឆ្លងកាត់ ផ្លូវប្រសព្វចោមចៅ ( អតីតរង្វង់មូលចោមចៅ) នៅថ្ងៃទី៣១ ខែមីនា ឆ្នាំ២០២២ ផងដែរ ពោលគឺចាប់ផ្តើមបិទនិងបញ្ជៀសចរាចរ ចាប់ពីម៉ោង៥ព្រឹក រហូតកម្មវិធីត្រូវបានបញ្ចប់។
គួរបញ្ជាក់ថា ស្ពានអាកាស និងផ្លូវក្រោមដីនៅចំណុចរង្វង់មូលចោមចៅ បានបើកការដ្ឋានដំណើរការសាងសង់ជាផ្លូវការកាលថ្ងៃទី២៩មិថុនា ឆ្នាំ២០១៨កន្លងមក ក្រោមអធិបតីភាព សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ស្ពានអាកាស និងផ្លូវក្រោមដីនេះជា គម្រោងរបស់រាជរដ្ឋាភិបាលកម្ពុជាតាមរយៈ រដ្ឋបាលរាជធានីភ្នំពេញ ដោយប្រើប្រាស់ថវិកាសាងសង់ចំនួន២២ លានដុល្លាអាមេរិក។
គិតត្រឹមដើមឆ្នាំ២០២២នេះ ក្នុងគោលដៅដោះស្រាយបញ្ហាកកស្ទះចរាចរណ៍អាជ្ញាធររាជធានីភ្នំពេញ បានសាងសង់ស្ពានអាកាសចំនួន៦កន្លែងហើយ រួមមាន ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសផ្សារដីហុយ និងស្ពានអាកាសចោមចៅ ដែលគ្រោងដាក់សម្ពោធជាផ្លូវការនៅថ្ងៃស្អែកនេះ ៕ អត្ថបទ៖ ពុធិកា
