មន្ទីរពេទ្យហ្លួងម៉ែដែលរាជរដ្ឋាភិបាលបានទិញពីម្ចាស់មន្ទីរពេទ្យនគរទេពសម្រាប់ដាក់ព្យាបាលអ្នកជំងឺ covid-19 នឹងប្រែក្លាយជាមន្ទីរពេទ្យឯកទេសព្យាបាលជំងឺមហារីក។
ស្ថិតនៅក្នុងកម្មវិធីសំណេះសំណាលជាមួយនឹងកីឡាករកីឡាការិនីនិងអត្តពលិកនៅព្រឹកមិញនេះ ប្រមុខរដ្ឋាភិបាលសម្ដេចតេជោ ហ៊ុន សែន បានលើកពីបំណងប្រែក្លាយមន្ទីរពេទ្យនេះពីព្យាបាលអ្នកជំងឺ covid-19 មកជាមន្ទីរពេទ្យឯកទេសមហារីកវិញ។
សម្តេចតេជោបានឲ្យដឹងថា មកទល់ថ្ងៃនេះក្រោមការមើលថែនិងការយកចិត្តទុកដាក់ខ្ពស់បំផុតរបស់រាជរដ្ឋាភិបាល អត្រាអ្នកឆ្លងជំងឺ covid-19 បានថយចុះមកនៅត្រឹមករណីតិចតួចបំផុតដែលនេះជាមោទនភាពបំផុតរបស់កម្ពុជា។
បើតាមប្រមុខរដ្ឋាភិបាល ជំងឺមហារីកក៏កំពុងកើតឡើងច្រើនករណីនៅក្នុងប្រទេសកម្ពុជា ដែលនេះគឺជាកត្តាគួរឲ្យព្រួយបារម្ភ។
សម្តេចតេជោ ហ៊ុន សែន មានប្រសាសន៍ថា ទោះបីជំងឺកូវីដ-១៩ បានថមថយក៏ពិតមែន តែកម្ពុជាមិនបោះបង់ការត្រៀមលក្ខណៈឆ្លើយតបនឹងបញ្ហាសុខភាពសាធារណៈនោះឡើយ គឺត្រូវតែបន្តការការពារជាបន្តទៀត។
រដ្ឋាភិបាលបានសម្រេចទិញយកមន្ទីរពេទ្យនគរទេពដោយប្រែក្លាយជាមន្ទីរពេទ្យហ្លួងម៉ែកាលពីថ្ងៃទី 27 ខែមីនា ឆ្នាំ2021 ដើម្បីប្រើប្រាស់ព្យាបាលអ្នកឆ្លងកូវីដ ១៩។ ក្រោយពីមើលឃើញអត្រានៃការឆ្លងជំងឺ covid-19 មានការថយចុះ សម្ដេចតេជោ មានបំណងចង់ប្ដូរអ្នកជំងឺ covid-19 ពីស្តាតអូឡាំពិកទៅមន្ទីរពេទ្យហ្លួងម៉ែឬមន្ទីរពេទ្យចាក់អង្រែ ព្រោះសម្ដេចមានបំណងចង់ស្ថាបនាស្តាតអូឡាំពិកឡើងវិញ សម្រាប់ហាត់កីឡាព្រមទាំងត្រៀមខ្លួនធ្វើជាម្ចាស់ផ្ទះស៊ីហ្គេមឆ្នាំ 2023៕
