កាលពីថ្ងៃទី៣០ ខែសីហា ឆ្នាំ២០២២ លោកជំទាវ លី សុខឆេង ទទួលបានការតែងតាំងជា «អគ្គនាយិកា» នៃក្រុមហ៊ុន ជីប ម៉ុង រីថែល (Chip Mong Retail) ដែលជាក្រុមហ៊ុនបុត្រសម្ព័ន្ធមួយរបស់ក្រុមហ៊ុនមេ ជីប ម៉ុង គ្រុប និងផ្តោតសំខាន់លើផ្នែកផ្សារទំនើប ជីប ម៉ុង ជាច្រើនកន្លែង។
មុនទទួលបានតំណែងដ៏ខ្ពស់បំផុតមួយនេះ លោកជំទាវ លី សុខឆេង បានកាន់តួនាទីជា អគ្គនាយិការងជាន់ខ្ពស់ ផ្សារទំនើប ជីប ម៉ុង រីថែល ខណៈដែលក្នុងកម្មវិធីចុះអនុស្សរណៈយោគយល់គ្នារបស់ផ្សារទំនើប ជីប ម៉ុង ជាច្រើន នាពេលកន្លងមក គេតែងឃើញវត្តមានរបស់លោកអគ្គនាយក អ្នកឧកញ៉ា លាង ម៉េង ហើយលោកជំទាវ តែងនៅអមជានិច្ច។
កាលពីថ្ងៃអង្គារ ម្សិលមិញនេះ ទំព័រហ្វេសប៊ុក Chip Mong Malls បានបង្ហោះសារអបអរសាទរដល់លោកជំទាវ យ៉ាងដូច្នេះថា៖ “សូមធ្វើការស្វាគមន៍យ៉ាងកក់ក្តៅ ចំពោះវត្តមានលោកជំទាវ លី សុខឆេង ក្នុងឱកាសតែងតាំងជាអគ្គនាយិកានៃក្រុមហ៊ុន ជីប ម៉ុង រីថែល”។
សូមបញ្ជាក់ថា ក្រុមហ៊ុន ជីប ម៉ុង គ្រុប បានបង្កើត ជីប ម៉ុង រីថែល ឡើងកាលឆ្នាំ២០១៧។ រហូតមកទល់បច្ចុប្បន្ន ក្រុមហ៊ុន ជីប ម៉ុង គ្រុប មានផ្សារទំនើបខ្នាតយក្សចំនួន៦ នៅរាជធានីភ្នំពេញ ក្នុងនោះមានដូចជា៖ ផ្សារទំនើបជីបម៉ុង ណូរ៉ូ ម៉ល (ផ្លូវមហាវិថីព្រះនរោត្តម) និងផ្សារទំនើបជីបម៉ុង បាក់ទូក សម្ពោធកាលចុងឆ្នាំ២០១៩, ផ្សារទំនើបជីបម៉ុង សែនសុខ ម៉ល និងផ្សារទំនើបជីបម៉ុង ៥៩៨ សម្ពោធ កាលពាក់កណ្តាលឆ្នាំ២០២០, ផ្សារទំនើបជីបម៉ុង ២៧១ មេហ្គាម៉ល សម្ពោធកាលពាក់កណ្តាលឆ្នាំ២០២១ និង Chip Mong Tower គ្រោងនឹងសម្ពោធ នៅឆ្នាំ២០២២នេះ៕
