កាលពីថ្មីៗនេះ ក្រុមហ៊ុន Adobe បានប្រកាសពីគោលបំណងចង់ទិញយកក្រុមហ៊ុន Figma ដែលផ្ដល់សេវាកម្មលើការឌីហ្សាញ ហើយវាបានបង្កើតឡើងកាលពីឆ្នាំ ២០១២ ដោយបុគ្គល ២ រូបគឺ Dylan Field និង Evan Wallace។
យោងតាមការចុះផ្សាយពី DNAIndia បានឲ្យដឹងថា Adobe នឹងចាយលុយប្រមាណ ២០ ពាន់លានដុល្លារទិញយកក្រុមហ៊ុនមួយនេះទាំងមូល ដែលនេះមានន័យថា Field នឹងក្លាយជាមហាសេដ្ឋីភ្លាមៗជាមួយនឹងទ្រព្យសម្បត្តិ ២ ពាន់លានដុល្លារ ក្រោយការចុះកិច្ចសន្យាបានសម្រេច ដ្បិតរូបគេមានភាគហ៊ុនសរុប ១០%។
សូមរំលឹកបកក្រោយបន្តិចថា សហស្ថាបនិក Figma ទាំង ២ រូបនេះគឺមិនបានបញ្ចប់ការសិក្សាថ្នាក់មហាវិទ្យាល័យឡើយ បើទោះជាពួកគេបានចូលរៀននៅសកលវិទ្យាល័យក្នុងក្ដីស្រមៃ Brown University។
អំឡុងពេលសិក្សានោះ Field បានចុះហាត់ការងារជាមួយក្រុមហ៊ុន LinkedIn និង Flipboard ហើយក៏បានសម្រេចចិត្តបោះបង់ការសិក្សា ដោយងាកមកធ្វើការពេញម៉ោងជាមួយ Figma ជាមួយនឹងប្រាក់ខែ ១០០ ០០០ ដុល្លារ។
ដោយឡែក កាលចាប់ផ្ដើមតំបូងៗបុរសវ័យ ៣០ ឆ្នាំក៏ជួបឧបសគ្គមិនតិចដងដែរ ដូចជាមានការជំទាស់ពីឪពុកម្ដាយ ដោយពួកគាត់យល់ឃើញថា Field មិនមានបទពិសោធន៍គ្រប់គ្រាន់ក្នុងការគ្រប់គ្រងអាជីវកម្មខ្លួនឯង និងកង្វះខាតកម្លាំងពលកម្មជាដើម។
យ៉ាងណា ដូចពាក្យចាស់ពោលថា “ព្យាយាមគង់បានសម្រេច” ទីបំផុតបុរសទាំង ២ រូបនេះបានជំនះឧបសគ្គទាំងពួង ហើយក៏បានទទួលផ្លែផ្កាយ៉ាងត្រចះត្រចង់ពីវាផងដែរ ពោលគិតត្រឹមមុនពេល Adobe ទិញយក Figma ពួកគេធ្លាប់មានអតិថិជនជាវសេវាកម្មធំៗដូចជា Microsoft, Uber, Zoom, Airbnb, GitHub ទៀតផង៕
