ស្ត្រីមួយរូប ដែលជាអតីតពលកររោងចក្រនៅប្រទេសថៃ បានបែកគំនិតបង្កើតសិប្បកម្មផលិតកាបូបស្បែកផ្ទាល់ខ្លួន និងមានទឹកដៃច្នៃប្រឌិតបែបខ្មែរ ធ្វើឱ្យប្រជាពលរដ្ឋខ្មែរមានការពេញចិត្ត កោតសរសើរយ៉ាងខ្លាំង ព្រមទាំងទទួលបានការគាំទ្រជាច្រើនពីអតិថិជន ដែលធ្វើឱ្យលោកស្រី អាចរកចំណូលបានយ៉ាងតិច ៣០០០ដុល្លារក្នុងមួយខែ។
លោកស្រី សុវណ្ណ ចាន់ឌីអា ម្ចាស់សិប្បកម្ម ពេជ្រសុវណ្ណសិប្បកម្មផលិតកាបូបស្បែកជាផលិតផលខ្មែរ ស្ថិតក្នុងភូមិកូនខ្លុង ឃុំព្រែកតូច ស្រុកមោងឫស្សី ខេត្តបាត់ដំបង បានថ្លែងប្រាប់ដល់ ឧកញ៉ា ញូស៍ យ៉ាងដូច្នេះថា ផលិតផលកាបូបស្បែកកន្លែងសិប្បកម្មលោកស្រី មានការគាំទ្រទិញពីសំណាក់អតិថិជនយ៉ាងច្រើនកុះករ ដោយសារតែផលិតផលលោកស្រី មានលក្ខណៈខុសប្លែក ហើយស្អាតពីកាបូបដទៃដូចជា មានការដាក់ឈ្មោះនិងលេខទូរស័ព្ទដោយឥតគិតថ្លៃនៅលើកាបូប គុណភាពស្បែក មានអុកត្រាខ្មែរ ដាក់រូបប្រាសាទអង្គរវត្តជាតំណាងផលិតផលខ្មែរ គឺក្នុងន័យជួយផ្សព្វផ្សាយ ដែលជាចំណុចធ្វើឱ្យបងប្អូនប្រជាពលរដ្ឋគាំទ្រ និងមានភាពទាក់ទាញបែបនេះ។
លោកស្រី បានបន្តថា នៅក្នុងសិប្បកម្មមានផលិតជា កាបូបខ្លី ប្រភេទកាបូប មានកាបូបបត់ខ្លី កាបូបបញ្ឈរ កាបូបវែង កាបូបកាន់ធំៗ ខ្សែក្រវ៉ាត់ ហើយកាបូបនីមួយៗ លក់មួយ តម្លៃចាប់ពី ១០ដុល្លារឡើងទៅដល់ ៣០ដុល្លារ។ ទន្ទឹមជាមួយតម្លៃនេះ លោកស្រីរកចំណូលបានទាបបំផុតខ្ទង់ ៣០០០ដុល្លារអាមេរិកក្នុងមួយខែ។
ជាមួយគ្នានេះ លោកស្រីក៏បានបង្ហើបទៀតថា វត្ថុធាតុដើម ដែលត្រូវផលិតជាកាបូបនេះ សុទ្ធតែនាំយកពីប្រទេសចិន និងភាគច្រើនមកពីប្រទេសថៃ រួមមាន៖ អំបោះ កាវ ស្បែកគោ ដែលកន្លះខែ លោកស្រីនាំចូលម្ដង ចំណាយប្រាក់ជិត ២០០០ដុល្លារអាមេរិក ដូច្នេះក្នុងមួយខែៗ នាំចូលជិត ៤០០០ដុល្លារអាមេរិកឯណោះ។
សិប្បករផលិតកាបូបរូបនេះ បន្តទៀតថា កត្តាដែលធ្វើឱ្យមានភ្ញៀវជាវទិញ និងគាំទ្រច្រើនបែបនេះ ដោយកត្តាពីរយ៉ាងគឺ ទី១ ភាពស្មោះត្រង់ ធ្វើជាអ្នកលក់ត្រូវមានភាពស្មោះត្រង់ដាក់ភ្ញៀវ វត្ថុធាតុដើមយកមកពីណា ត្រូវជម្រាបប្រាប់ភ្ញៀវត្រង់ៗ ឯទី២ គុណភាពផលិតផលល្អ ស្វិតធន់ជាប់បានយូរ ប្រើមិនងាយនឹងខូចជាដើម។
ទន្ទឹមនឹងនេះ លោកស្រីក៏បានថ្លែងអំណរគុណដល់អតិថិជនយ៉ាងជ្រាលជ្រៅ ដែលបានជួយកម៉្មង់ទិញផលិតផលលោកស្រីមករហូត ហើយលោកស្រីក៏បានរំពឹងទុកទៅថ្ងៃអនាគតដែរថា ផលិតផលនេះ នឹងមានការជាវទិញកាន់តែច្រើនទាំងក្នុងស្រុក និងក្រៅស្រុក។ លោកស្រី និងក្រុមការងារនឹងខិតខំប្រឹងប្រែងកែច្នៃផលិតផលនេះឱ្យកាន់តែមានលក្ខណៈស្តង់ដារជាងមុន និងដាក់តាំងលក់នៅលើទីផ្សារឱ្យមានឈ្មោះល្បីល្បាញ និងមានឱកាសនាំចេញទៅក្រៅប្រទេសផងដែរ។
គួររំឭកផងដែរថា ដំបូងឡើយ លោកស្រី សុវណ្ណ ចាន់ឌីអា ជាអតីតពលករដេរកាបូបក្នុងរោងចក្រនៅប្រទេសថៃ ប៉ុន្តែក្រោយមក លោកស្រីវិលត្រឡប់មកស្រុកវិញ បែកគំនិតរកស៊ី ចាប់ផ្ដើមពីកន្លែងដេរកាបូបតូចមួយ ដោយយកបទពិសោធន៍ធ្វើការងារនៅប្រទេសថៃប្រមាណជាង ៥ឆ្នាំ បូករួមនឹងការច្នៃប្រឌិតឡើងដោយគំនិតផ្ទាល់ខ្លួនទៀត ពង្រីកទៅជាសិប្បកម្មដោយចំណាយដើមទុនជិត ៥០០០ដុល្លារអាមេរិក ហើយប្រើរយៈពេលជិត ១ឆ្នាំ ទម្រាំរួចដើម ចាប់ពីឆ្នាំ២០១៨ មកដល់បច្ចុប្បន្ន ប្រមាណជិត៥ឆ្នាំមកហើយ៕
