ប្រិយមិត្តពិតជាភ្ញាក់ផ្អើលខ្លាំងណាស់ នៅពេលស្រាប់តែដឹងថា អ្នកដឹកនាំរឿង និងអ្នកនិពន្ឋល្បីឈ្មោះ ហ្វៃ សំអាង បានចូលខ្លួនមកប្រឡូកជាថ្មី ក្នុងការមកដឹកនាំសម្តែង ភាពយន្តចម្រៀងដ៏មានអត្ថន័យ កប់ជ្រៅ និយាយពីជីវិតពិតរបស់ថ្នាក់ដឹកនាំ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
តាមការបង្ហោះឱ្យដឹងលើគណនីហ្វេសប៊ុកផ្លូវការរបស់ផលិតករភាពយន្តដ៏ល្បីល្បាញ និងជាអ្នកទទួលបន្ទុកដឹកនាំសម្តែងភាពយន្តចម្រៀង «ទុក្ខស្រីប្តីព្រាត់» និង «ជីវិតក្មេងវត្ត» លោក ហ្វៃ សំអាង បានថ្លៃងអំណរគុណ សម្តេចតេជោ ហ៊ុន សែន បានផ្តល់ឱកាសឲ្យលោកដឹកនាំការសម្ដែងបទ ជីវិតក្មេងវត្ត ជាលើកទីពីរ ដែលស្នាដៃទី១ ផលិតនៅឆ្នាំ២០០០ ដោយផលិតកម្ម ហង្សមាស មកដល់ពេលនេះមានរយះពេល២២ឆ្នាំហើយ កាលពីផលិតលើកទី១ ប្រើរយៈពេលតែមួយថ្ងៃទេព្រោះជារបៀបចម្រៀងកាយវិការ ខារ៉ាអូខេ ហើយក៏មានការគាំទ្រខ្លាំងក្លាដែរធ្វើឲ្យតារាដែលសម្ដែងនៅក្នុងបទនេះកាន់តែមានប្រជាប្រិយភាពខ្ពស់នាសម័យនោះ។
លោកបន្តថា«លើកទី២នេះផលិតដោយសមាគមសិល្បករខ្មែរ មានទម្រង់ជាភាពយន្តចម្រៀង ខុសពីការផលិតលើកទី១ ប្រើរយៈពេលជិតមួយឆ្នាំ អ្វីដែលខ្ញុំចង់និយាយនៅពេលនេះគឺ បទចម្រៀងនេះខ្ញុំស្រលាញ់ពេញចិត្ត ជាបទចម្រៀងដែលមានគ្រប់ជ្រុងជ្រោយ ទំនុកបទភ្លេងមានអត្តសញ្ញាណជាខ្មែរ ពិរោះទាក់ទាញអ្នកស្តាប់បានគ្រប់វ័យ ទំនុកច្រៀងមានអត្ថន័យជ្រាលជ្រៅ កាព្យឃ្លោងចុងចួនរណ្តំណែងណង ជាពិសេសបង្កប់ទៅដោយការអប់រំ បណ្តុះគំនិតឲ្យស្រលាញ់ការសិក្សា ប្រតិបត្តិធម៌អាថ៍ មានគុណធម៌ សុជីវធម៌ តស៊ូអត់ធន កុំអស់សង្ឃឹមនឹងភាពក្រ។ ល។ ព្រោះជាខ្សែជីវិតពិតរបស់សម្ដេចតេជោផ្ទាល់»។
ទន្ទឹមគ្នានេះ លោក ហ្វៃ សំអាង ក៏បានលើកឡើងបន្តថា«បុគ្គលបន្ទាប់ដែលលោកត្រូវអរគុណគឺឧត្តមភរិយាជាទីស្រលាញ់របស់លោក ព្រោះជាទីប្រឹក្សាមិនអាចខ្វះបានសម្រាប់លោក និងជាអ្នកចាំតិះទៀនស្ថាបនា។ បុគ្គលបន្ទាប់គឺឧកញ៉ា ហេង ឡុង លោកជំទាវ ចន ច័ន្ទលក្ខិណា ឧកញ៉ា អ៉ឹង លីហេង បានដាក់ទុនដើម្បីផលិតភាពយន្តចម្រៀង ជីវិតក្មេងវត្ត នេះចេញមកបាន ជាពិសេសអ្នកឧកញ៉ា ឡេងណាវ៉ាត្រា បានឧបត្ថម្ភសម្ភារថត ហើយគ្រប់បុគ្គលដែលលោកត្រូវចងចាំនិងអរគុណពួកគាត់គឺតារាសម្តែង ព្រមទាំងក្រុមការងារគ្រប់ផ្នែកទាំងអស់ដែលបានយកបេះដូងមកធ្វើការ»។
អ្នកដឹកនាំរឿង និងអ្នកនិពន្ឋល្បីឈ្មោះរូបនេះ ក៏បានបញ្ជាក់ដែរថា លទ្ធផលដែលចេញមកបានល្អបែបនេះគឺមិនអាចខ្វះអ្នកណាម្នាក់បានទេ គឺចេញមកពីការសហការគ្នាបានយ៉ាល្អមិនអញនិយម។ បុគ្គលបន្ទាប់មកទៀតគឺលោក លៀក លីដា ប្រធានសមាគមភាពយន្តខ្មែរនិងជាអគ្គនាយកផលិតកម្ម LD picture បានជួយសហការចំពោះការងារកាត់ត តម្លើងMaster ។
យ៉ាងណា ជាចុងក្រោយ លោកក៏បានអរគុណអ្នកដែលផ្តល់ឱសថទិព្វថាមពលពិសេស សម្រាប់លោកនិងក្រុមការងារផលិតគ្រប់ផ្នែកទាំងអស់ គឺបងប្អូនទូរទស្សនិកជន គ្រប់ជាន់ថ្នាក់។ ហើយអ្នកដែលបានជួយឲ្យភាពយន្តចម្រៀងនេះបានទៅដល់បងប្អូនទូរទស្សនិកជនគឺ អស់លោកអ្នកសារព័ត៌មាន គ្រប់ប្រព័ន្ធផ្សព្វផ្សាយទាំងអស់។
លោកថ្លែងថា៖ «មេដាយកិត្តិយសដែលខ្ញុំបាទទទួលបានពីសម្តចតេជោ ហ៊ុន សែន ប្រទានពីព្រះកុណា សម្តេចព្រះនរោត្តម សីហមុនី បំពាក់ដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ប្រៀបបាននឹងដុំពេជ្រនៅក្នុងបេះដូងរបស់ខ្ញុំអរគុណសន្តិភាព»។
គួរបញ្ជាក់ដែរថា ភាពយន្តចម្រៀង ប្រវត្តិសាស្ត្រ «ជីវិតក្មេងវត្ត» ត្រូវបានដាក់សម្ពោធផ្សព្វផ្សាយជាសាធារណៈជាផ្លូវការហើយ ក្រោមវត្តមានលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ កាលថ្ងៃទី២៨ ខែកញ្ញា ឆ្នាំ២០២២ ដោយមានការចូលរួមយ៉ាងច្រើនកុះករពីមន្ត្រីក្រសួង អ្នកឧកញ៉ា លោកឧកញ៉ា លោកជំទាវ ជាអ្នកឧបត្ថម្ភ ផលិតករ អ្នកដឹកនាំរឿង សិល្បករ និងភ្ញៀវកិត្តិយសសរុបរហូត ២០០០នាក់៕ អត្ថបទ៖ រង្សី
