មហាសេដ្ឋីក្មេងៗកំពុងបន្តកើនឡើង ប៉ុន្តែបើនិយាយពីលំដាប់កំពូលវិញ ក្រុមស្ដេចត្រាញ់មានលុយខ្ទង់រយពាន់លានដុល្លារ សុទ្ធតែមានវ័យជរាណាស់ទៅហើយ។
តួយ៉ាង អ្នកមានបំផុតលើលោក Bernard Arnault គឺមានអាយុ ៧៤ឆ្នាំ ខណៈបិតាវិនិយោគិន Warren Buffett វិញ មានវ័យរហូតដល់ទៅ ៩២ ឆ្នាំឯណោះ ខណៈទ្រព្យសម្បត្តិរបស់ពួកគេ អាចនិយាយបានថា ចាយដល់តជំនាន់ក៏សឹងតែមិនអស់ផង។
យោងតាមការចុះផ្សាយពី CNBC បានបង្ហាញថា អាយុជាមធ្យមរបស់មហាសេដ្ឋី ៣ ១៩៤នាក់ គឺ ៦៧ឆ្នាំ ដែលលើសវ័យចូលនិវត្តន៍នៅអាមេរិក ដែលកំណត់ត្រឹម ៦៦ ឆ្នាំ និង ២ខែប៉ុណ្ណោះ ខណៈមហាសេដ្ឋី ៤២% មានអាយុលើសពី ៧០ឆ្នាំ ហើយមានតិចជាង ១០% ប៉ុណ្ណោះ ដែលមានអាយុក្រោម ៥០ឆ្នាំ។
ដោយឡែក ក្រុមមហាសេដ្ឋីដែលមានអាយុខុសៗគ្នាក៏មានប្រភពនៃទ្រព្យសម្បត្តិខុសៗគ្នាដែរ ដោយប្រភពចំណូលធំៗគឺ វិស័យបច្ចេកវិទ្យា និងហិរញ្ញវត្ថុ ពោលមហាសេដ្ឋីមានអាយុក្រោម ៥០ឆ្នាំ ទំនោររកស៊ីលើវិស័យហិរញ្ញវត្ថុ ២១% និងវិស័យបច្ចេកវិទ្យា ២០%។
ចំណែកមហាសេដ្ឋីវ័យចន្លោះពី ៥០-៧០ឆ្នាំ ភាគច្រើនរកស៊ីលើវិស័យហិរញ្ញវត្ថុ ២៤% និងក្រុមហ៊ុនឧស្សាហកម្ម ៨,៣% ស្របពេលស្ដេចត្រាញ់អាយុលើសពី ៧០ឆ្នាំ កើបលុយពីវិស័យហិរញ្ញវត្ថុ ១៨% ក្រុមហ៊ុនសាជីវកម្ម ១១% និងអចលនទ្រព្យ ៨,៣%៕
