ក្រុមហ៊ុនវិនិយោគលំដាប់កំពូលអាមេរិក Berkshire Hathaway ដែលគ្រប់គ្រងដោយមហាសេដ្ឋី Warren Buffett នៅតែបន្តផែនការរបស់ខ្លួន ដើម្បីកាត់បន្ថយការកាន់កាប់ភាគហ៊ុន នៅ BYD ដែលជាក្រុមហ៊ុនផលិតរថយន្តអគ្គិសនី ដ៏ឈានមុខគេមួយរបស់ប្រទេសចិន។
បើតាមការចុះផ្សាយពីសារព័ត៌មាន Reuters បានបង្ហាញឱ្យដឹងថាក្រុមហ៊ុន Berkshire បានសម្រេចដកចេញភាគហ៊ុនចំនួន ២,៥៣ លានហ៊ុន នៅក្នុងក្រុមហ៊ុន BYD ដែលបានចុះនៅក្នុងបញ្ជីភាគហ៊ុនរបស់ហុងកុង នៅក្នុងតម្លៃប្រមាណ ៦៧៥,៨ លានដុល្លារហុងកុង (៨៦,៣លានដុល្លារ) ។
គួរឱ្យដឹងថា ការលក់ចុងក្រោយនេះ បានកាត់បន្ថយសិទ្ធិកាន់កាប់ភាគហ៊ុនរបស់ Berkshire នៅក្នុងក្រុមហ៊ុន BYD មកនៅត្រឹម ៨,៩៨% ប៉ុណ្ណោះ ពីចំនួន ៩,២១% ។ នេះបើតាមឯកសារចុងក្រោយមួយ ដែលបានផ្ញើទៅកាន់ទីផ្សារភាគហ៊ុនហុងកុង។
ជម្រាបជូនផងដែរថា ក្រុមហ៊ុនរបស់មហាសេដ្ឋី Warren Buffett បានធ្វើការកាត់បន្ថយភាគហ៊ុនរបស់ខ្លួន នៅក្នុងក្រុមហ៊ុនផលិតរថយន្តអគ្គិសនីខ្នាតយក្សរបស់ចិនមួយនេះ ជាបន្តបន្ទាប់ ដោយគិតចាប់តាំងពីចុងខែសីហា ឆ្នាំមុនមក ៕
