យោងតាមសាកលវិទ្យាល័យសភាពាណិជ្ជកម្មថៃ (UTCC) បានបង្ហាញថា ការពន្យាពេលយូរ ក្នុងការជ្រើសរើសនាយករដ្ឋមន្ត្រីថ្មី និងការបង្កើតរដ្ឋាភិបាលថ្មី អាចនឹងនាំឱ្យមានការតវ៉ា ហើយប្រសិនបើមានអំពើហិង្សាកើតឡើង នោះវាច្បាស់ជានឹងផ្តល់ផលប៉ះពាល់ខ្លាំង ដល់ចំណូលដែលបានពីវិស័យទេសចរណ៍ និងអាចធ្វើឱ្យបាត់បង់ថវិកាជាតិរាប់រយពាន់លានបាត ផងដែរ។
មិនតែប៉ុណ្ណោះ លោក Thanavath Phonvichai ប្រធាន UTCC បាននិយាយ កាលពីថ្ងៃព្រសហស្បតិ៍ថា ការបោះឆ្នោតជ្រើសរើសនាយករដ្ឋមន្ត្រីថ្មី ត្រូវបានចាត់ទុកថាជាសូចនាករដ៏សំខាន់ នៃការងើបឡើងវិញនៃសេដ្ឋកិច្ចរបស់ថៃ ប៉ុន្តែសាកលវិទ្យាល័យ បានផ្តល់ក្តីបារម្ភយ៉ាងខ្លាំង ចំពោះការបង្កើតរដ្ឋាភិបាលថ្មី ដែលអាចអូសន្លាយរយ:ពេលយូរ ។
លោក Thanavath បានមានប្រសាសន៍ទៀតថា ៖ “ទាំងអ្នកជំនួញ និងអ្នកប្រើប្រាស់ កំពុងឃ្លាំមើលយ៉ាងដិតដល់បំផុត ចំពោះការជ្រើសរើសនាយករដ្ឋមន្ត្រីថ្មីរបស់ថៃ ដែលអាចទាមទារឱ្យមានការបោះឆ្នោតជាច្រើន ” ។
លើសពីនេះ UTCC បានព្យាករអំពីផលប៉ះពាល់សេដ្ឋកិច្ចតិចតួច ប្រសិនបើការជ្រើសរើសនាយករដ្ឋមន្ត្រីថ្មី និងការបង្កើតរដ្ឋាភិបាលថ្មី អាចដំណើរការទៅបាន ក្នុងអំឡុងខែសីហា ឬខែកញ្ញា ពីព្រោះវាស្ថិតនៅក្នុងក្របខ័ណ្ឌថវិកា ដែលមានស្រាប់។ ប៉ុន្តែ UTCC ក៏បានបង្ហាញទៀតផងដែរថា ប្រសិនបើការបង្កើតរដ្ឋាភិបាលថ្មី ត្រូវអូសបន្លាយហួសពីខែតុលា នោះការរៀបចំបែងចែកថវិកាថ្មី ក៏អាចនឹងត្រូវពន្យាពេលទៅត្រីមាសទី ២ ឆ្នាំក្រោយ ដែលអាចរារាំងដល់ការពង្រីកកំណើនសេដ្ឋកិច្ច ជាក់ជាមិនខាន។
ជាងនេះទៅទៀត លោក Thanavath បាននិយាយថា ប្រសិនបើការជ្រើសរើសនាយករដ្ឋមន្ត្រី និងការបង្កើតរដ្ឋាភិបាលថ្មី អាចដំណើរការទៅដោយរលូន ដោយគ្មានការតវ៉ា នោះវានឹងអនុញ្ញាតឱ្យមានការអនុវត្តគំនិតផ្តួចផ្តើមវិនិយោគ ហើយសេដ្ឋកិច្ចក៏អាចកើនឡើងដល់ ៤% ផងដែរ នៅឆ្នាំនេះ ។
ប៉ុន្តែទន្ទឹមនឹងនេះ ប្រសិនបើដំណើរការជ្រើសរើស និងការបង្កើតរដ្ឋាភិបាលថ្មី ប្រឈមមុខនឹងបាតុកម្មធ្ងន់ធ្ងរ ដែលនាំឱ្យបរទេស ចេញការព្រមានអំពីការធ្វើដំណើរមកកាន់ប្រទេសថៃនោះ ចំនួនភ្ញៀវទេសចរបរទេស នៅក្នុងឆមាសទីពីរនៃឆ្នាំនេះ អាចនឹងធ្លាក់ចុះ ១០ លាននាក់។ ហើយបញ្ហានេះ អាចនឹងនាំឱ្យបាត់បង់ប្រាក់ចំណូលពីវិស័យទេសចរណ៍ដល់ទៅ ៥០០ពាន់លានបាត និងថយចុះ ១% នៃផលិតផលក្នុងស្រុកសរុប ថែមទៀតផង ៕
