ប្រធានរដ្ឋសភាថ្មីរបស់ប្រទេសសិង្ហបុរី លោក Seah Kian Peng បានធ្វើពិធីសម្បថចូលកាន់តំណែង និងបានទទូចឲ្យសមាជិកសភាទាំងអស់ រក្សានូវឥរិយាបថថ្លៃថ្នូរ ក្រោយមានរឿងអាស្រូវកាលពីពេលថ្មីៗនេះ។
យោងតាមការចុះផ្សាយពីសារព័ត៌មាន CNA បានបង្ហាញថា លោក Seah បានក្លាយជាប្រធានសភាទី ១១ ប្រចាំប្រទេស ដោយបន្តតំណែងពីលោក Tan Chuan-Jin ដែលបានលាលែង ក្រោយចាប់បានមានទំនាក់ទំនងស្នេហាលួចលាក់ ជាមួយសមាជិកសភា អ្នកនា Cheng Li Hui ដែលបានលាលែងពីតំណែងដូចគ្នា។
បន្ថែមពីនោះ ប្រធានរដ្ឋសភាថ្មី ដែលមានអាយុ ៦១ឆ្នាំ បានសច្ចាថា នឹងបំពេញតួនាទីរបស់លោកឲ្យបានល្អបំផុត ដោយគ្មានភាពលំអៀង ហ្មត់ចត់ និងយុត្តិធម៌។
សូមជម្រាបបន្ថែមថា លោក Seah ធ្លាប់ជាសមាជិកសភានៃមណ្ឌលតំណាង Marine Parade Group Representation Constituency តាំងពីឆ្នាំ ២០០៦ ហើយលោកធ្លាប់ធ្វើជាអនុប្រធានសភាពីខែតុលា ឆ្នា ២០១១ ដល់ខែមករាឆ្នាំ ២០១៦ ផងដែរ៕
