រថភ្លើងពាសដែកដឹកមេដឹកនាំកំពូលកូរ៉េខាងជើង លោក គីម ជុងអ៊ុន បានចូលដល់ទឹកដីរុស្ស៊ី កាលពីថ្ងៃទី១២ ខែកញ្ញាម្សិលមិញ ខណៈលោក គីម បានអះអាងថា ដំណើរទស្សនកិច្ចដ៏កម្រនេះ គឺបង្ហាញពីសារៈសំខាន់នៃភាពជាដៃគូទំនាក់ទំនងដ៏រឹងមាំ រវាងប្រទេសទាំង២។ នេះបើតាមការចុះផ្សាយពីកាសែតរដ្ឋកូរ៉េខាងជើង KCNA។
បណ្ដាញសារព័ត៌មានខាងលើបានរាយការណ៍បន្ថែមថា លោក គីម ជុងអ៊ុន បានបញ្ជាក់ពីដំណើរទស្សនកិច្ចរបស់លោក ទៅកាន់សហព័ន្ធរុស្ស៊ីថា ជាការបង្ហាញឲ្យឃើញកាន់តែច្បាស់ពីគោលជំហររបស់គណបក្សពលករ (WPK) និងរដ្ឋាភិបាលកូរ៉េខាងជើង ដែលផ្ដល់អាទិភាពចំពោះសារៈសំខាន់នៃទំនាក់ទំនងយុទ្ធសាស្ត្ររវាងសាធារណរដ្ឋប្រជាធិបតេយ្យប្រជាមានិតកូរ៉េ (DPRK) និងរុស្ស៊ី។
សូមជម្រាបដែរថា រថភ្លើងពាសដែករបស់លោក គីម បានទៅដល់ទីក្រុង Khasan កាលពីព្រឹកថ្ងៃអង្គារសប្ដាហ៍នេះ និងទទួលបានការស្វាគមន៍យ៉ាងកក់ក្ដៅពីសំណាក់រដ្ឋមន្ត្រីធនធានធម្មជាតិរុស្ស៊ី លោក Alexander Kozlov។
ថ្វីបើទៅដល់រុស្ស៊ីតាំងពីម្សិលមិញក៏ពិតមែន ប៉ុន្តែមកទល់ពេលនេះ មេដឹកនាំកូរ៉េខាងជើង នៅមិនទាន់ជួបមុខប្រធានាធិបតីរុស្ស៊ី វ៉្លាឌីមៀ ពូទីននៅឡើយទេ ដោយកំពុងធ្វើដំណើរតាមរយៈរថភ្លើងពាសដែកដដែល ខណៈអ្នកនាំពាក្យវិមានក្រឹមឡាំងអះអាងថា ជំនួបរវាងមេដឹកនាំទាំង២ នឹងកើតឡើងក្នុងពេលដ៏ខ្លីខាងមុខ៕
