គណបក្សភឿថៃ ដែលកំពុងកាន់អំណាចបាននិយាយនៅថ្ងៃសុក្រនេះថា អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ដែលកំពុងជាប់ពន្ធនាគារនោះ អាចនឹងកាន់តំណែងជាទីប្រឹក្សារដ្ឋាភិបាលថ្មីបាន។ នេះបើតាមការចុះផ្សាយពីសារព័ត៌មាន AFP ។
នាយករដ្ឋមន្ត្រីថៃថ្មី លោក Srettha Thavisin បាននិយាយនៅដើមសប្តាហ៍នេះថា លោកថាក់ស៊ីន នៅតែអាចបម្រើប្រទេសជាតិក្នុងជួររដ្ឋាភិបាលបាន ខណៈឧបនាយករដ្ឋមន្ត្រី Phumtham Wechayachai បាននិយាយនៅថ្ងៃសុក្រនេះទៀតថា លោកគាំទ្រលើគោលគំនិត ក្នុងការដែលអាចអោយលោកថាក់ស៊ីន ក្លាយជាទីប្រឹក្សារដ្ឋាភិបាល។
ឧបនាយករដ្ឋមន្ត្រីរូបនេះដដែរក៏បានបន្ថែមថា៖ វានឹងក្លាយជារឿងល្អ ពីព្រោះគាត់មានបទពិសោធន៍ ហើយគាត់នឹងផ្តល់ផលប្រយោជន៍យ៉ាងសំខាន់ដល់ប្រទេសជាតិ។
ប្រភពពីគណបក្សមួយផ្សេងទៀតក៏បានបញ្ជាក់ប្រាប់ទីភ្នាក់ងារសារព័ត៌មាន AFP ដែរថា រដ្ឋាភិបាលចម្រុះថ្មីដែលដឹកនាំដោយគណបក្សភឿថៃ គ្រោងនឹងពិគ្រោះជាមួយលោក ថាក់ស៊ីន ពីបញ្ហាមួយនេះ នៅពេលដែលលោកត្រូវបានដោះលែងពីពន្ធនាគារ។
គួររំលឹកដែរថា បុរសវ័យ ៧៤ឆ្នាំរូបនេះ ត្រូវបានទម្លាក់ដោយរដ្ឋប្រហារយោធាកាលពីឆ្នាំ ២០០៦ ខណៈកាលពីខែមុន លោកបានត្រលប់មកមាតុប្រទេសវិញ ហើយត្រូវបានចាប់ខ្លួនភ្លាមៗ លើបទប្រព្រឹត្តអំពើពុករលួយ និងប្រើអំណាចខុសច្បាប់ អំឡុងពេលរូបលោកនៅកាន់តំណែងជានាយករដ្ឋមន្ត្រី។
ប៉ុន្តែត្រឹមប៉ុន្មានម៉ោងនៃការជាប់ពន្ធនាគារនោះ លោកថាក់ស៊ីន ត្រូវបានផ្លាស់ទៅបន្ទប់ឯកជនមួយនៅមន្ទីរពេទ្យប៉ូលីស ដោយសារតែបញ្ហាសុខភាពទន់ខ្សោយ។
សូមជម្រាបបន្ថែមថា កាលពីថ្ងៃសុក្រ ទី០២ ខែកញ្ញាកន្លងទៅ លោកថាក់ស៊ីនត្រូវបានបន្ធូរបន្ថយទោសជាប់ពន្ធនាគារពី ៨ឆ្នាំ មកនៅត្រឹម ១ឆ្នាំវិញ ក្រោយពីទទួលបានការប្រោសប្រទានទោសពីព្រះមហាក្សត្រ៕
