ទង្វើដែលប្រទេសអ៊ីស្រាអែលកំពុងធ្វើទៅលើប្រជាជនប៉ាឡេស្ទីន នៅតំបន់ Gaza គឺហួសពីអ្វីដែលពួកគេអះអាងថាជាការការពារខ្លួន ហើយរដ្ឋាភិបាលអ៊ីស្រាអែលត្រូវតែបញ្ឈប់រាល់សកម្មភាព ដែលប្រៀបដូចជាការដាក់ទណ្ឌកម្មលើប្រជាជនប៉ាឡេស្ទីន។ នេះបើតាមការអះអាងពីប្រមុខការទូតចិន លោក Wang Yi បាននិយាយនាថ្ងៃទី១៥ ខែតុលា។
សារព័ត៌មាន CNA បានដកស្រង់សម្ដីរបស់លោក Wang ដែលបានលើកឡើងថា៖ សកម្មដែលអ៊ីស្រាអែលបានធ្វើ គឺវាលើសពីអ្វីដែលពួកគេអះអាងថា ការពារខ្លួន។ ពួកគេគួរតែបើកចិត្តឲ្យទូលាយ ស្ដាប់ការសម្របសម្រួលពីសមាគមន៍អន្តរជាតិ និងអង្គការសហប្រជាជាតិ ហើយត្រូវតែបញ្ឈប់រាល់ការដាក់ទណ្ឌកម្មលើប្រជាជននៅតំបន់ Gaza។
គួររំលឹកដែរថា បន្ទាប់ពីរងការវាយឆ្មក់ពីក្រុមសកម្មប្រយុទ្ធប៉ាឡេស្ទីនកាលពីថ្ងៃសៅរ៍សប្ដាហ៍មុន កងកម្លាំងអ៊ីស្រាអែល បានបើកការវាយប្រហារវិញភ្លាមៗនៅតំបន់ Gaza ដែលជាមូលដ្ឋានរបស់ក្រុមឧទ្ទាមហាម៉ាស និងបានសម្លាប់ប្រជាជនច្រើនជាង ២ ២០០នាក់។
ជម្រាបបន្ថែមថា ស្ថានីយ៍ទូរទស្សន៍ជាតិចិន CCTV បានរាយការណ៍កាលពីថ្ងៃអាទិត្យម្សិលមិញថា បេសកជនពិសេសរបស់ចិន លោក Zhai Jun នឹងបំពេញទស្សនកិច្ចទៅកាន់តំបន់មជ្ឈិមបូព៌ានាសប្ដាហ៍ក្រោយ ដើម្បីពន្លឿនការចរចាសន្តិភាព និងសំណូមពរឲ្យឈប់បាញ់បោះ រវាងក្រុមហាម៉ាស និងកងកម្លាំងអ៊ីស្រាអែល៕
