ប្រធានាធិបតីរុស្ស៊ី លោក វ៉្លាឌីមៀ ពូទីន បានធ្វើដំណើរទៅដល់ប្រទេសចិន ក្រោមការអញ្ជើញពីមេដឹកនាំកំពូល លោក ស៊ី ជិនពីង ដើម្បីចូលរួមកិច្ចប្រជុំកំពូលគំនិតផ្ដួចផ្ដើមខ្សែក្រវ៉ាត់ និងផ្លូវ ដែលរៀបចំឡើងនៅទីក្រុងប៉េកាំង។
យោងតាមការចុះផ្សាយពីសារព័ត៌មាន France24 បានរាយការណ៍ថា យន្តហោះរបស់លោក ពូទីន បានចុះចតនៅប្រលានយន្តហោះចិនមុនម៉ោង ៩ និង៣០នាទីព្រឹក ខណៈមេដឹកនាំរុស្ស៊ី គ្រោងជួបជាមួយប្រធានាធិបតីចិន នាថ្ងៃទី១៨ ស្អែកនេះ។
នាកិច្ចប្រជុំរវាងមេដឹកនាំកំពូលនៃប្រទេសទាំង២ មានក្ដីរំពឹងទុកថា លោក ពូទីន និងលោក ស៊ី អាចជជែកគ្នាពីហេតុការណ៍ដែលកំពុងកើតមានសព្វថ្ងៃ ដូចជាសង្គ្រាមរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន និងអាចជជែកពីការពង្រឹងកិច្ចសហប្រតិបត្តិការណ៍រវាងប្រទេសទាំង២ ផងដែរ។
ជម្រាបបន្ថែមថា ចិននឹងបើកទ្វារស្វាគមន៍អ្នកតំណាង មកពីប្រទេសប្រហែល ១៣០ប្រទេស ដោយក្នុងនោះរុស្ស៊ីស្ថិតនៅកំពូលបញ្ជីឈ្មោះភ្ញៀវកិត្តិយស សម្រាប់កិច្ចប្រជុំកំពូលនៃវេទិកាគំនិតផ្ដួចផ្ដើមខ្សែក្រវ៉ាត់ និងផ្លូវ លើកទី០៣ ដែលធ្វើឡើងនៅទីក្រុងប៉េកាំង ពីថ្ងៃទី១៧ ដល់ទី១៨ ខែតុលា៕
