នាយករដ្ឋមន្ត្រីថៃ លោក Srettha Thavisin បានទៅបំពេញទស្សនកិច្ចក្នុងប្រទេសឡាវ នៅព្រឹកថ្ងៃចន្ទនេះ ហើយបានស្នើឱ្យប្រទេសទាំងពីរ សាងសង់ស្ពានផ្លូវដែកថ្មីមួយ ដើម្បីជួយសម្រួលដល់ការធ្វើពាណិជ្ជកម្មទ្វេភាគីបន្ថែមទៀត។ នេះបើតាមការចុះផ្សាយពីកាសែត Bangkok Post ។
អ្នកនាំពាក្យរបស់រដ្ឋាភិបាលថៃ លោក Chai Wacharonke បាននិយាយថា នាយករដ្ឋមន្ត្រី លោក Srettha បានស្នើឱ្យប្រទេសទាំងពីរ ធ្វើការកែលម្អការដឹកជញ្ជូន និងពាណិជ្ជកម្មទ្វេភាគី ហើយប្រែក្លាយឡាវ និងភាគឦសាននៃប្រទេសថៃ ទៅជា “តំបន់លូតលាស់រួមគ្នា” ។
នៅក្នុងឱកាសនៃការទៅបំពេញទស្សនកិច្ចទៅកាន់ប្រទេសឡាវនោះ លោក Srettha បានស្នើគម្រោងសាងសង់ស្ពានផ្លូវរថភ្លើងថ្មីមួយឆ្លងទន្លេមេគង្គ ដោយតភ្ជាប់ពីខេត្ត Nong Khai ទៅកាន់ទីក្រុងវៀងចន្ទន៍ប្រទេសឡាវ។
លោក Chai ក៏បានបន្ថែមឱ្យដឹងទៀតថា នាយករដ្ឋមន្ត្រីថៃ បានត្រៀមខ្លួនរួចជាស្រេចហើយ ក្នុងការផ្តល់ប្រាក់កម្ចីដល់ប្រទេសឡាវ ដើម្បីធ្វើជាមូលនិធិដល់គម្រោងនេះ ខណ:ប្រទេសថៃ ក៏មានចំណាប់អារម្មណ៍ក្នុងការទិញយកថាមពលស្អាតបន្ថែមទៀត ពីប្រទេសឡាវ ដើម្បីគាំទ្រដល់កំណើនឧស្សាហកម្មរបស់ខ្លួន ផងដែរ ៕
