នាយកប្រតិបត្តិក្រុមហ៊ុនអាកាសចរណ៍ JetBlue លោក Robin Hayes នឹងចុះចេញពីតំណែងនាខែក្រោយ ដោយសារបញ្ហាសុខភាព ខណៈតំណែងមួយនេះនឹងជំនួសដោយលោកស្រី Joanna Geraghty ដែលជាប្រធានក្រុមហ៊ុនវិញ។ នេះបើតាមការចុះផ្សាយពីសារព័ត៌មាន USNews។
លោក Hayes ដែលមានវ័យ ៥៧ឆ្នាំ បានបញ្ជាក់ថា លោកលាឈប់ដោយសារបញ្ហាសុខភាព ដ្បិតសំពាធការងាររបស់លោកគឺមានទំនួលខុសត្រូវខ្ពស់ ស្របពេលវេជ្ជបណ្ឌិតក៏បានណែនាំឲ្យលោកសម្រាក ថែទាំសុខភាព ហើយភរិយារបស់លោកក៏គាំទ្រជាមួយការសម្រេចចិត្តរបស់លោកផងដែរ។
ជាមួយគ្នា លោកស្រី Geraghty ក៏បានបង្ហាញអារម្មណ៍រីករាយ ចំពោះការទទួលបានតំណែងសំខាន់មួយទៀតនៅក្នុងក្រុមហ៊ុន ហើយបានបន្ថែមថា លោកស្រី និងក្រុមការងារ នឹងរៀបចំយុទ្ធសាស្ត្រថ្មីៗជាច្រើន ដើម្បីបង្កើនផលប្រយោជន៍កាន់តែច្រើនជូនក្រុមហ៊ុន ក៏ដូចជាក្រុមវិនិយោគិនថែមទៀត។
ជម្រាបបន្ថែមថា លោកស្រី Geraghty គឺបានចូលរួមជាមួយក្រុមហ៊ុនអាកាសចរណ៍ JetBlue តាំងពីឆ្នាំ២០០៥ ហើយបានបន្តឡើងតំណែងជាប្រធានក្រុមហ៊ុន កាលពីឆ្នាំ២០១៨ និងបន្តកាន់តំណែងជា CEO ថ្មីនៃក្រុមហ៊ុនបន្ថែមទៀត ខណៈការតែងតាំងនឹងធ្វើឡើងនាថ្ងៃទី១២ ខែកុម្ភៈខាងមុខ៕
