កាលពីថ្ងៃទី២៨ ខែមីនា តុលាការបានសម្រេចដាក់ទោសលោក Sam Bankman-Fried ឲ្យជាប់ពន្ធនាគារ ២៥ឆ្នាំ បន្ទាប់ពីរកឃើញថា លោកពិតជាបានប្រព្រឹត្តអំពើឆបោកទឹកប្រាក់ដ៏ធំបំផុតមួយ នៅក្នុងុសហរដ្ឋអាមេរិក។
យោងតាមការចុះផ្សាយពីសារព័ត៌មាន Reuters បានបង្ហាញថា ចៅក្រម Lewis Kaplan បានសម្រេចដាក់ទោសស្ថាបនិកក្រុមហ៊ុន FTX ក្រោយអតីតមហាសេដ្ឋីរូបនេះ បាននិយាយកុហកតុលាការថា អតិថិជនរបស់ FTX មិនបានខាតបង់ទឹកប្រាក់ឡើយ តែការពិតរូបគេបានលួចប្រាក់ប្រហែល ៨ពាន់លានដុល្លារឯណោះពីអតិថិជន។
ក្រៅពីនោះ តុលាការក៏បានចោទប្រកាន់បុរសវ័យ ៣២ឆ្នាំរូបនេះថា មានជាប់ពាក់ព័ន្ធនឹងករណីឆបោក ៧ករណីបន្ថែមទៀត និងបានធ្វើឲ្យក្រុមហ៊ុន FTX ក្ស័យធន បណ្ដាលឲ្យវិនិយោគិន និងអតិថិជនរាប់រយនាក់ ទទួលរងការខាតបង់ជាខ្លាំង។
សូមជម្រាបដែរថា ករណីឆបោកនេះ ត្រូវបានចាត់ទុកថា ជាការឆបោកទឹកប្រាក់ធំបំផុតមួយនៅអាមេរិក ហើយកន្លងមកព្រះរាជអាជ្ញាបានទាមទារឲ្យកាត់ទោសលោក Sam រហូតដល់ ៥០ឆ្នាំ ស្របពេលមេធាវីការពារក្ដីតវ៉ាឲ្យមានការជាប់ទោសត្រឹម ៦ឆ្នាំកន្លះ តែជាលទ្ធផលតុលាការសម្រេចដាក់ទោស ២៥ឆ្នាំ៕
