ក្រុមហ៊ុនផលិតបន្ទះឈីបកំពូលរបស់ពិភពលោក Taiwan Semiconductor Manufacturing Company (TSMC) បានព្រមានថា ផលប៉ះពាល់ពីគ្រោះរញ្ជួយដីដ៏ធ្ងន់ធ្ងរនៅលើកោះតៃវ៉ាន់ កាលពីថ្ងៃពុធកន្លងទៅ អាចបណ្តាលឲ្យក្រុមហ៊ុនខាតបង់ប្រមាណ ៦០លានដុល្លារ នៅក្នុងប្រាក់ចំណូលសម្រាប់ត្រីមាសទីពីររបស់ខ្លួន។ នេះបើតាមការចុះផ្សាយពីសារព័ត៌មាន Reuters។
យោងតាមការវាយតម្លៃបឋមពីស្ថាប័នស្រាវជ្រាវ Barclays បានបង្ហាញឲ្យដឹងទៀតថា ផលប៉ះពាល់នេះគឺកើតឡើងដោយសារតែការងារត្រូវបានបញ្ឈប់នៅក្នុងក្រុមហ៊ុន TSMC និងមជ្ឈមណ្ឌលផលិតបន្ទះឈីបផ្សេងទៀត ដែលស្ថិតនៅលើកោះនេះ បន្ទាប់ពីមានការរញ្ជួយដីធ្ងន់ធ្ងរដល់កម្រិត ៧,២ ដែលជាទំហំដ៏ធំបំផុតមិនធ្លាប់មាន ក្នុងរយៈពេល ២៥ឆ្នាំចុងក្រោយ។
TSMC ដែលជាក្រុមហ៊ុនផ្គត់ផ្គង់បន្ទះឈីបដ៏ធំរបស់ Apple និង Nvidia បាននិយាយថា ខ្លួនបានជម្លៀសបុគ្គលិកចេញពីរោងចក្រផលិតមួយចំនួន ដើម្បីធានាដល់សុវត្ថិភាព ខណ:ពេលដែលសកម្មភាពផលិតកម្មត្រូវបានផ្អាក។
ជម្រាបជូនផងដែរថា បើតាមអាជ្ញាធរទីក្រុងតៃប៉ិ បាននិយាយថា គ្រោងរញ្ជួយដីដែលបានវាយប្រហារនៅម៉ោងប្រហែល ៨ ព្រឹក ថ្ងៃពុធ បានសម្លាប់មនុស្ស ៩ នាក់ និងជាង ៨០០ នាក់ផ្សេងទៀតរងរបួស ខណ:ក្រុមអ្នកជួយសង្គ្រោះបានទាញយកមនុស្សយ៉ាងហោចណាស់ ៧៧ នាក់ដែលជាប់នៅក្នុងផ្លូវក្រោមដី និងអគារដែលដួលរលំ៕
