ព្រះមហាក្សត្រ King Charles បានចាប់ផ្ដើមបំពេញការងាររបស់ទ្រង់វិញ ដោយគ្រោងបំពេញទស្សនកិច្ចនៅមជ្ឈមណ្ឌលព្យាបាលជំងឺមហារីក ក៏ដូចជាចុះសាកសួរសុខទុក្ខប្រជាពលរដ្ឋ បន្ទាប់ពីទ្រង់បានសំងំព្យាបាលជំងឹ ដែលត្រូវបានរកឃើញកាលពីខែកុម្ភៈ។ នេះបើតាមការចុះផ្សាយពីសារព័ត៌មាន Reuters។
ជាមួយគ្នាវិមាន Buckingham Palace ក៏បានប្រកាសដែរថា ក្រុមគ្រូពេទ្យក៏នៅតែព្យាយាមតានដានស្ថានភាពជំងឺ របស់ស្ដេចអង់គ្លេស ដោយសារទ្រង់ត្រូវបានពិនិត្យឃើញថា មានការវិវត្តជំងឺមហារីក ដែលកំពុងស្ថិតក្រោមការតាមដានយ៉ាងយកចិត្តទុកដាក់ ពីក្រុមគ្រូពេទ្យ។
យ៉ាងណា បន្ទាប់ពីសំងំថែរក្សាសុខភាពរយៈពេលជិត ៣ខែ ព្រះមហាក្សត្រ King Charles ក៏បានប្រាប់ទៅកាន់មន្ត្រីក្នុងជួររដ្ឋាភិបាលថា ទ្រង់មានសុខភាពល្អមាំទាំវិញ និងអាចធ្វើការងារនៅតាមទីសាធារណៈមួយចំនួនបានហើយ។
បន្ថែមពីនោះ ទ្រង់ និងព្រះមហេសីម្ចាស់ក្សត្រី Queen Camilla ក៏កំពុងត្រៀមបើកទ្វាររាជវាំង ទទួលព្រះចៅអធិរាជជប៉ុន Naruhito និងព្រះនាង Masako ក្នុងព្រះរាជដំណើរទស្សនកិច្ចផ្លូវការ នាចុងខែមិថុនាខាងមុខផងដែរ៕
