វៀតណាម បានបាត់បង់តំណែងកំពូលរបស់ខ្លួន បន្ទាប់ពីឡាវ បានដណ្តើមយកតំណែងក្នុងនាមជាអ្នកផ្គត់ផ្គង់កាហ្វេធំជាងគេបំផុត ទៅកាន់ប្រទេសថៃ នៅក្នុងឆ្នាំនេះ។ នេះបើតាមការចុះផ្សាយពីសារព័ត៌មាន VN Express។
ក្រសួងឧស្សាហកម្ម និងពាណិជ្ជកម្ម បង្ហាញថា ក្នុងរយៈពេលពីរខែដំបូងនៃឆ្នាំនេះ ប្រទេសថៃបាននាំចូលកាហ្វេពី ១៨ ប្រទេស និងដែនដី ជុំវិញពិភពលោក។ ក្នុងនោះ ឡាវជាអ្នកផ្គត់ផ្គង់កាហ្វេធំជាងគេទៅប្រទេសថៃ ជាមួយចំនួនសរុប ៣ ៤៦០ តោន ដែលមានតម្លៃ ១៣,៤លានដុល្លារ។ កម្រិតនេះបានកើនឡើង ១៦,២% គិតនៅក្នុងបរិមាណ និង ៤៨,៥% គិតជាតម្លៃ បើធៀបនឹងរយៈពេលដូចគ្នាកាលពីឆ្នាំមុន។
យ៉ាងណាមិញ ដោយសារការកើនឡើងនៃតម្រូវការកាហ្វេដោយជនជាតិថៃ ចំណែកទីផ្សារកាហ្វេរបស់ឡាវ នៅក្នុងការនាំចូលសរុបនៅក្នុងទីផ្សារនេះ បានកើនឡើងពី ៤២,២២% ក្នុងរយៈពេលពីរខែដំបូងនៃឆ្នាំមុន ដល់ ៦១,៧៤% ក្នុងរយៈពេលដូចគ្នា ក្នុងឆ្នាំនេះ។
ក្រៅពីឡាវ ថៃក៏បានបង្កើនការនាំចូលកាហ្វេពីប្រទេសឥណ្ឌូណេស៊ី ម៉ាឡេស៊ី និងប្រេស៊ីល ផងដែរ។
ផ្ទុយទៅវិញ វៀតណាម ដែលធ្លាប់តែគ្រងតំណែងលេខ១ បានក្លាយជាអ្នកផ្គត់ផ្គង់កាហ្វេធំលំដាប់ទីពីរ សម្រាប់ប្រទេសថៃវិញ។ ជាក់ស្តែងក្នុងរយៈពេលពីរខែដំបូងនៃឆ្នាំនេះ ប្រទេសថៃបាននាំចូលកាហ្វេពីប្រទេសវៀតណាមចំនួន ១ ៣៦០ តោន ដែលមានតម្លៃ ៧,៤៣លានដុល្លារ។ តួលេខនេះបានថយចុះចំនួន ៦៤,៧% ក្នុងបរិមាណ និង ៣៥,៦% គិតជាតម្លៃ ធៀបនឹងរយៈពេលដូចគ្នាកាលពីឆ្នាំមុន។
ជាលទ្ធផលចំណែកទីផ្សារកាហ្វេរបស់វៀតណាម ក្នុងការនាំចូលសរុបទៅកាន់ប្រទេសថៃ បានថយចុះពី ៥៤,៥៤% ក្នុងរយៈពេលពីរខែដំបូងនៃឆ្នាំ២០២៤ មកនៅត្រឹម ២៤,២៤% ក្នុងរយ:ពេលដូចគ្នា នៅឆ្នាំនេះ៕
