ប្រធានាធិបតីអាមេរិក លោក ដូណាល់ ត្រាំ ត្រូវបានគេរាយការណ៍ថា គ្រោងនឹងចុះហត្ថលេខាលើបទបញ្ជាប្រតិបត្តិថ្មីមួយផ្សេងទៀតនៅសប្តាហ៍នេះ ដើម្បីបន្តពន្យារពេលថ្ងៃផុតកំណត់ សម្រាប់ក្រុមហ៊ុនមេ ByteDance ក្នុងការដកកម្មវិធីកម្សាន្តដ៏ល្បីល្បាញបំផុតមួយរបស់ពិភពលោក TikTok ចេញពីទឹកដីសហរដ្ឋអាមេរិក ជាលើកទីបី។ នេះបើតាមការចុះផ្សាយពីសារព័ត៌មាន Reuters។
យោងតាមអ្នកនាំពាក្យសេតវិមាន លោកស្រី Karoline Leavitt បាននិយាយនៅថ្ងៃទី១៧ ខែមិថុនាថា ៖”សប្តាហ៍នេះប្រធានាធិបតីលោក ត្រាំ នឹងចុះហត្ថលេខាលើបទបញ្ជាប្រតិបត្តិមួយផ្សេងទៀត ដើម្បីរក្សា TikTok ឲ្យនៅបើកដំណើរការ នៅសហរដ្ឋអាមេរិក។ ក្នុងអំឡុងការបន្ថែមពេលផុតកំណត់ ៩០ថ្ងៃនោះ រដ្ឋាភិបាលអាមេរិក នឹងធ្វើការដើម្បីធានាបានថាច្បាប់នៃការបិទប្រតិបត្តិការកម្មវិធីនោះ នឹងត្រូវបានពន្យារ ដោយអនុញ្ញាតឲ្យពលរដ្ឋអាមេរិក នៅតែអាចបន្តប្រើប្រាស់ TikTok ជាមួយនឹងទិន្នន័យរបស់ពួកគេដែលត្រូវបានការពារ” ។
គួរឲ្យដឹងថា តាមច្បាប់អាមេរិកគឺតម្រូវឲ្យ TikTok បញ្ឈប់ប្រតិបត្តិការត្រឹមថ្ងៃទី១៩ ខែមករាមកម្លេះ ហើយកម្មវិធីនេះអាចដំណើរការទៅបានលុះត្រាតែក្រុមហ៊ុនមេរបស់ TikTok គឺ ByteDance លក់កម្មវិធីនះឲ្យក្រុមហ៊ុនណាមួយរបស់អាមេរិក។
ប៉ុន្តែបន្ទាប់ពីការចូលកាន់តំណែងនៅថ្ងៃទី២០ ខែមករា ប្រធានាធិបតី លោក ត្រាំ បានចុះហត្ថលេខាលើបទបញ្ជាប្រតិបត្តិដើម្បីពន្យារពេលការបិទកម្មវិធី TikTok នៅសហរដ្ឋអាមេរិក ជាបន្តបន្ទាប់។ ហើយនៅក្នុងបទសម្ភាសជាមួយ NBC News កាលពីខែមុន លោក ត្រាំ បាននិយាយថា លោកនឹងបន្តពន្យាពេលផុតកំណត់បន្ថែមទៀត ប្រសិនបើគ្មានកិច្ចព្រមព្រៀងណាមួយត្រូវបានកើតឡើងទេនោះ។
ជម្រាបជូនថា បច្ចុប្បន្ននេះមានភាគីជាច្រើនដែលចាប់អារម្មណ៍ក្នុងការទិញយកកម្មវិធី TikTok នៅអាមេរិក រួមទាំងក្រុមហ៊ុន Oracle ក្រុមហ៊ុន AppLovin និង Project Liberty របស់មហាសេដ្ឋី Frank McCourt ផងដែរ។ តែទោះយ៉ាងណាវាមិនទាន់ច្បាស់ថាតើរដ្ឋាភិបាលចិន នឹងអនុម័តកិច្ចព្រមព្រៀងណាមួយនោះទេ៕
