មេធំធនាគារកណ្តាលអាមេរិក ថាមិនប្រញាប់កាត់បន្ថយអត្រាការប្រាក់ទេ ទោះ ត្រាំ គម្រាមដកតំណែង

ប្រធានាធនាគារកណ្តាលអាមេរិក (FED) លោក Jerome Powell បានឲ្យដឹងកាលពីពេលថ្មីៗនេះថា ហានិភ័យនៃអតិផរណាដែលអាចកើនឡើង ក្នុងរដូវក្តៅនេះ ធ្វើឲ្យធនាគារកណ្តាលអាមេរិក មិនទាន់ត្រៀមខ្លួនរួចជាស្រេច ក្នុងការកាត់បន្ថយអត្រាការប្រាក់ននោះឡើយ បើទោះបីជាមានការជំរុញ ដោយប្រធានាធិបតី លោក ដូណាល់ ត្រាំ ក៏ដោយ។ នេះបើតាមការចុះផ្សាយពីសារព័ត៌មាន Reuters។

កាលពីថ្ងៃទី១៤ ខែមិថុនា ក្នុងអំឡុងពេលសវនាការមួយ នៅចំពោះមុខគណៈកម្មាធិការសេវាកម្មហិរញ្ញវត្ថុនៃសភាតំណាងសហរដ្ឋអាមេរិក ប្រធានធនាគារកណ្តាល លោក Powell ត្រូវបានសួរដេញដោល ដោយសមាជិកសភាមកពីគណបក្សសាធារណរដ្ឋ អំពីមូលហេតុដែល FED មិនទាន់ព្រមកាត់បន្ថយអត្រាការប្រាក់ ដូចដែលប្រធានាធិបតី លោក ត្រាំ បានស្នើសុំ។ ក្នុងអំឡុងពេលនោះ លោក Powell បានពន្យល់ថាលោក រួមទាំងមន្រ្តីរបស់ Fed ជាច្រើនបានព្យាករថា អតិផរណានឹងកើនឡើងម្តងទៀត ក្នុងពេលឆាប់ៗខាងមុខនេះ។

យ៉ាងណាមិញ កាលពីពេលថ្មីៗនេះ លោក Powell បាននិយាយថាលោក ក៏នៅតែមិនទាន់បានត្រៀមខ្លួនរួចជាស្រេច ក្នុងការកាត់បន្ថយអត្រាការប្រាក់ សម្រាប់កិច្ចប្រជុំថ្មីមួយដែលនឹងត្រូវធ្វើឡើងនាខែកក្កដា ដូចដែលសហការីមួយចំនួនរបស់លោក បានរំពឹងទុក នោះឡើយ។​

លោក Powell បានបញ្ជាក់ថា ៖” ខ្ញុំមិនចង់បង្ហាញថាកិច្ចប្រជុំមួយណា ដែលយើងនឹងត្រូវធ្វើការកាត់បន្ថយអត្រាការប្រាក់នោះទេ។ បច្ចុប្បន្ន យើងមិនប្រញាប់នោះឡើយ”។ លោកបានសង្កត់ធ្ងន់ទៀតថា ទីផ្សារការងារ នៅតែមានរឹងមាំ ហើយយផលប៉ះពាល់នៃពន្ធគយ នៅតែរក្សាភាពមិនច្បាស់លាស់ចំពោះសេដ្ឋកិច្ចដដែល។

ជម្រាបជូនផងដែរថា ប្រធានាធិបតី លោក ត្រាំ បានជំរុញម្តងហើយម្តងទៀតឲ្យធនាគារកណ្តាលអាមេរិក កាត់បន្ថយអត្រាការប្រាក់ ក្នុងរយៈពេលប៉ុន្មានខែកន្លងមកនេះ។ នៅលើបណ្តាញទំនាក់ទំនងសង្គម Truth Social កាលពីថ្ងៃទី២៣ ខែមិថុនា លោក​ ត្រាំ ក៏បានអំពាវនាវជាថ្មីម្តងទៀតឲ្យ Fed កាត់បន្ថយអត្រាការប្រាក់ ក្នុងកម្រិតពិន្ទុបន្ថែម ២-៣% ដោយសារតែលោកមើលមិនឃើញថាសហរដ្ឋអាមេរិកមានអតិផរណានោះឡើយ។ ហើយមិនតែប៉ុណ្ណោះ ប្រធានាធិបតីអាមេរិក ក៏បានបន្តរិះគន់ចំៗទៅលើលោក Jerome Powell ថាជាមនុស្សរឹងរូស និង​គំរាម​ប្តូរចិត្ត ដកតំណែងរបស់លោកថែមទៀតផង៕