សហរដ្ឋអាមេរិក កាលពីពេលថ្មីៗនេះ បានប្រកាសផ្អាកផ្តល់ជំនួយជាសព្វាវុធសំខាន់ៗមួយចំនួនដល់អ៊ុយក្រែន ដោយក្នុងនោះរួមរួមទាំងកាំជ្រួច Patriot និងសព្វាវុធសម្រាប់យន្តហោះ F-16 ដោយសារព្រួយបារម្ភអំពីការថយចុះនៃកម្រិតស្តុកទុកអាវុធនៅក្នុងស្រុក។ នេះបើតាមការចុះផ្សាយពីសារព័ត៌មាន AP។
សេតវិមាន បាននិយាយកាលពីថ្ងៃទី១ ខែកក្កដាថា សហរដ្ឋអាមេរិក នឹងផ្អាករាល់ការផ្តល់សព្វាវុធមួយចំនួនដែលបានសន្យាដល់អ៊ុយក្រែន ដោយសារតែមានរបាយការណ៍ពីមន្ទីរបញ្ចកោណដែលបានបង្ហាញថា ឃ្លាំងស្តុកទុកអាវុធរបស់យោធាអាមេរិក មានការធ្លាក់ចុះយ៉ាងខ្លាំង។
ទន្ទឹមនឹងនេះ អ្នកនាំពាក្យសេតវិមាន លោកស្រី Anna Kelly បាននិយាយថា៖ ការសម្រេចនេះ ត្រូវបានធ្វើឡើងដោយផ្នែកលើគោលការណ៍នៃការដាក់ផលប្រយោជន៍របស់សហរដ្ឋអាមេរិកជាចម្បង បន្ទាប់ពីមន្ទីរបញ្ចកោណបានពិនិត្យមើលឡើងវិញនូវការគាំទ្រផ្នែកការពារជាតិ និងសកម្មភាពជំនួយយោធាសម្រាប់ប្រទេសនានា ជុំវិញពិភពលោក។
គួរជម្រាបជូនថា គេនៅមិនទាន់ដឹងទេថាតើសព្វាវុធប្រភេទណា ដែលនឹងត្រូវផ្អាកឡើយ ប៉ុន្តែគ្រាប់បែក និងមីស៊ីលការពារដែនអាកាស ត្រូវគេជឿជាក់ថានឹងស្ថិតក្នុងចំណោមសព្វាវុធទាំងនោះ។ នេះបើយោងតាមប្រភពរបស់ទីភ្នាក់ងារព័ត៌មាន Reuters៕
