ទ្រព្យសម្បត្តិសរុបរបស់នាយកប្រតិបត្តិក្រុមហ៊ុន Nvidia លោក Jensen Huang ទំនងអាចវ៉ាដាច់បិតាវិនិយោគ Warren Buffett នៅក្នុងពេលឆាប់ៗនេះ បន្ទាប់ពីភាគហ៊ុនរបស់ក្រុមហ៊ុនផលិតបន្ទះឈីបកំពូលអាមេរិកនេះ ហក់ឡើងយ៉ាងខ្លាំង នៅក្នុងសប្តាហ៍នេះ ដែលធ្វើឲ្យ Nvidia ក្លាយជាក្រុមហ៊ុនមានតម្លៃថ្លៃបំផុត ក្នុងប្រវត្តិសាស្រ្ត។
Nvidia កាលពីថ្ងៃពុធកន្លងទៅ បានក្លាយជាក្រុមហ៊ុនដំបូងគេដែលឈាននដល់តម្លៃមូលធនទីផ្សារ ៤ទ្រីលានដុល្លារ ខណ:ពេលដែលភាគហ៊ុនរបស់ខ្លួន បានកើនឡើងលើសពី ១៦៣ដុល្លារ ក្នុងមួយហ៊ុន។
យ៉ាងណាមិញ លោក Huang ដែលជានាយកប្រតិបត្តិរបស់ Nvidia កាន់កាប់ភាគហ៊ុនក្នុងដៃប្រហែល ៣,៥% ត្រូវបានគេមើលឃើញថាទ្រព្យសម្បត្តិសរុបរបស់លោក បានហក់ឡើងដល់ ១៤២ពាន់លានដុល្លារ បន្ទាប់ពីមានការកើនឡើង ២,៤៧ពាន់លានដុល្លារ ក្នុងរយ:ពេលត្រឹមតែមួយថ្ងៃប៉ុណ្ណោះ។
ការកើនឡើងក្នុងសប្តាហ៍នេះបានធ្វើឲ្យលោក Huang ក្លាយជាអ្នកមានបំផុតទី១០ នៅលើពិភពលោក នៅក្នុងបញ្ជីចំណាត់ថ្នាក់មហាសេដ្ឋីកំពូលរបស់ Bloomberg ដោយតាមនៅពីក្រោយនាយកប្រតិបត្តិក្រុមហ៊ុន Berkshire Hathaway លោក Warren Buffett ដែលមានទ្រព្យសម្បត្តិសរុបប្រមាណ ១៤៤ពាន់លានដុល្លារ។
ជម្រាបជូនថា នៅក្នុងកម្រិតនោះ វានឹងមិនចំណាយច្រើនសម្រាប់លោក Huang ដើម្បីវ៉ាដាច់លោក Buffett នៅក្នុងចំណាត់ថ្នាក់នេះឡើយ ដោយអ្នកវិភាគរបស់ Wall Street ភាគច្រើនមានសុទិដ្ឋិនិយមថាភាគហ៊ុនរបស់ Nvidia នឹងនៅតែបន្តហក់ឡើងបន្ថែមទៀត ចំពេលតម្រូវការបន្ទះឈីបសម្រាប់ AI ជំនាន់ថ្មី កំពុងមានការកើនឡើងយ៉ាងខ្លាំង៕
