ប្រទេសចិន នឹងចាប់ផ្ដើមបន្តការនាំចូលឈើពីប្រទេសអូស្ត្រាលីវិញ ខណៈការចរចាអំពីដំណើរទស្សនកិច្ចរបស់នាយករដ្ឋមន្ត្រី Anthony Albanese ទៅកាន់ទីក្រុងប៉េកាំងកំពុងស្ថិតក្នុងការពិចារណា។ នេះបើតាមសម្ដដីរបស់ឯកអគ្គរដ្ឋទូតចិនប្រចាំទីក្រុងកង់បេរ៉ាបាននិយាយ។
ដោយឡែក CNA បានរាយការណ៍បន្ថែមថា ការនាំចូលឈើពីអូស្ត្រាលី ទៅកាន់ប្រទេសចិនបានផ្អាកកាលពីចុងឆ្នាំ ២០២០ ដោយសាររដ្ឋាភិបាលក្រុងប៉េកាំងរកឃើញថា មានសត្វល្អិតនៅក្នុងការដឹកជញ្ជូនមកពីកំពង់ផែអូស្ត្រាលីជាច្រើន។
“កាលពីម្សិលមិញ គយចិនបានជូនដំណឹងជាផ្លូវការទៅរដ្ឋមន្ត្រីក្រសួងកសិកម្មអូស្ត្រាលីថា ចាប់ពីថ្ងៃនេះទៅ ចិននឹងបន្តការនាំចូលឈើអូស្ត្រាលីឡើងវិញ”។ នេះបើតាមការអះអាងពីឯកអគ្គរដ្ឋទូត Xiao Qian បានលើកឡើង។
គួរជម្រាបដែរថា ទំហំពាណិជ្ជកម្មលើផលិតផលឈើរវាងចិន និងអូស្ត្រាលីមានប្រមាណ ៤០៧លានដុល្លារប្រចាំឆ្នាំ ខណៈការបើកដំណើរការឡើងវិញ ចំពោះការនាំចេញឈើអូស្ត្រាលី កើតឡើងប៉ុន្មានថ្ងៃបន្ទាប់ពីរដ្ឋមន្ត្រីពាណិជ្ជកម្មអូស្ត្រាលីលោក Don Farrell ត្រឡប់ពីបំពេញទស្សនកិច្ចនៅទីក្រុងប៉េកាំង។
ដោយឡែក ឯកអគ្គរដ្ឋទូត Xiao Qian ក៏បានបង្ហើបដែរថា លោករំពឹងថាដំណើរទស្សនកិច្ចរបស់នាយករដ្ឋមន្ត្រីអូស្ត្រាលីទៅកាន់ប្រទេសចិន នឹងកើតមានឡើងឆាប់ៗ ពោលអាចនឹងកើតឡើងនៅឆមាសទី ២ នៃឆ្នាំនេះ៕
