ភាគហ៊ុនរបស់ក្រុមហ៊ុនផលិតរថយន្តជប៉ុន បានកើនឡើងយ៉ាងខ្លាំង បន្ទាប់ពីមានព័ត៌មានថាពន្ធនាំចូលរថយន្តរបស់ប្រទេសនេះ ទៅកាន់សហរដ្ឋអាមេរិក ត្រូវបានកាត់បន្ថយមកនៅត្រឹម ១៥% ។ នេះបើតាមការចុះផ្សាយពីសារព័ត៌មាន Reuters។
នៅក្នុងការបើកការជួញដំបូង នៅថ្ងៃទី២៣ ខែកក្កដានេះ ភាគហ៊ុនរបស់ក្រុមហ៊ុនផលិតរថយនុ្តជប៉ុន ហក់ឡើងព្រមៗគ្នា ពោលគឺបន្ទាប់ពីសារព័ត៌មានក្នុងស្រុក NHK បានរាយការណ៍ ពន្ធនាំចូលរបស់សហរដ្ឋអាមេរិក លើរថយន្តមកពីជប៉ុន ត្រូវបានកាត់បន្ថយពី ២៥% មកនៅត្រឹម ១៥%។
ភាគហ៊ុនរបស់ក្រុមហ៊ុន Honda ឥឡូវនេះ ត្រូវបានគេរាយការណ៍ថា បានកើនឡើងដល់ ១០% ស្របពេល Mitsubishi បានកើនឡើង ១៣% ចំណែកឯ Nissan កើនឡើងជិត ៩% ស្របពេល Mazda និង Toyota ហក់ឡើងខ្ពស់ជាងគេបំផុត ដល់ ១៧% និង ១៣,៦% រៀងគ្នា។
គួរឲ្យដឹងថា កាលពីមុនប្រធានាធិបតីអាមេរិក លោក ដូណាល់ ត្រាំ បានប្រកាសយកពន្ធនាំចូល ២៥% លើរថយន្តទាំងអស់ដែលនាំចូលសហរដ្ឋអាមេរិក ចាប់ពីថ្ងៃទី២ ខែមេសា។ រថយន្ត គឺជាសសរស្តម្ភមួយនៃសេដ្ឋកិច្ចជប៉ុនដែលរួមចំណែកដល់ ២៨,៣% នៃការនាំចេញរបស់ខ្លួន ទៅកាន់សហរដ្ឋអាមេរិកក្នុងឆ្នាំ២០២៤។
ជម្រាបជូនថា នៅក្នុងការបង្ហោះសារមួយនៅលើបណ្តាញសង្គម Truth Social លោក ត្រាំ បាននិយាយថា ឥឡូវនេះ សហរដ្ឋអាមេរិក និងជប៉ុន បានឈានដល់កិច្ចព្រមព្រៀងពាណិជ្ជកម្មជាមួយគ្នាហើយ បន្ទាប់ពីមានការចរចាអស់រយ:ពេលជាយូរ ដោយអាមេរិក យល់ព្រមពន្ធទម្លាក់ពន្ធគយលើទំនិញជប៉ុនមកនៅ ១៥% ស្របពេលជប៉ុនយល់ព្រមវិនិយោគចំនួន ៥៥០ពាន់លានដុល្លារ នៅក្នុងសហរដ្ឋអាមេរិក៕
