យោងតាមយោធាឡាវ បាននិយាយនៅថ្ងៃទី២៦ ខែកក្កដានេះថា គ្រាប់កាំភ្លើងធំចំនួនប្រហែល ១០ គ្រាប់ បានធ្លាក់មកលើទឹកដីរបស់ខ្លួន បណ្តាលឲ្យខូចខាតផ្ទះសម្បែង និងទ្រព្យសម្បត្តិ ខណ:ការប្រយុទ្ធគ្នារវាងភាគីកម្ពុជា និងថៃនៅតែបន្តកើនឡើងកម្តៅខ្លាំង។ នេះបើតាមការចុះផ្សាយពីសារព័ត៌មាន CGTN។
នាយកដ្ឋានប្រតិបត្តិការពិសេសនៃខេតចំប៉ាសាក់ ប្រទេសឡាវ បានប្រកាសនៅថ្ងៃសៅរ៍នេះថា គ្រាប់កាំភ្លើងធំចំនួន ១០ គ្រាប់ បានធ្លាក់មកលើទឹកដីរបស់ខ្លួន អំឡុងពេលមានការប៉ះទង្គិចគ្នារវាងកងទ័ពកម្ពុជា និងថៃ កាលពីថ្ងៃទី ២៤-២៥ ខែកក្កដា។
គ្រាប់ផ្លោងទាំងនេះ បានបំផ្លាញផ្ទះសម្បែង និងសំណង់ជាច្រើននៅក្នុងខេត្តចំប៉ាសាក់ ប៉ុន្តែយោធាឡាវ មិនទាន់អាចកំណត់បាននៅឡើយទេថាអ្នកណាជាអ្នកបាញ់ គ្រាប់ទាំងនេះ។ ចំប៉ាសាក់ គឺជាខេត្តមួយស្ថិតនៅភាគនិរតីនៃប្រទេសឡាវ ដែលជាប់ព្រំដែនជាមួយកម្ពុជា និងថៃ។
គួរឲ្យដឹងផងដែរថា ការប្រយុទ្ធគ្នារវាងថៃ និងកម្ពុជា នៅតាមបណ្តោយព្រំដែនបានឈានដល់ចូលដល់ថ្ងៃទី៣ ហើយ។ ប្រទេសថៃនិយាយថាជម្លោះនេះបានបណ្តាលឲ្យយមនុស្ស២០នាក់ស្លាប់ ក្នុងនោះមានជនស៊ីវិល១៤នាក់ និងទាហាន ៦នាក់ និងរាប់សិបនាក់ផ្សេងទៀតរងរបួស ។ ស្របពេលក្រសួងការពារជាតិកម្ពុជា និយាយថា មនុស្ស១៣នាក់បានស្លាប់ និង៧១នាក់រងរបួស។
បន្ទាប់ពីកិច្ចប្រជុំបិទទ្វារនៃក្រុមប្រឹក្សាសន្តិសុខអង្គការសហប្រជាជាតិស្តីពីជម្លោះព្រំដែនកម្ពុជា-ថៃ កាលពីថ្ងៃទី២៥ ខែកក្កដា ឯកអគ្គរាជទូតកម្ពុជា ឯកឧត្តម កែវ ឈា បានអំពាវនាវឲ្យមានបទឈប់បាញ់ជាបន្ទាន់ និងដោយគ្មានលក្ខខណ្ឌ ក៏ដូចជាដំណោះស្រាយដោយសន្តិវិធី ដើម្បីដោះស្រាយជម្លោះ។
ប៉ុន្តែយ៉ាងណាក៏ដោយ នៅព្រឹកថ្ងៃទី២៦ ខែកក្កដា នេះ កម្លាំងពីភាគីទាំងសងខាងបានបន្តប៉ះទង្គិចគ្នានៅទីតាំងថ្មី នៅព្រំដែនខេត្តពោធិសាត់ របស់កម្ពុជា។
ជម្រាបជូនថា ភាពតានតឹងរវាងថៃនិងកម្ពុជាបានកើនឡើងតាំងពីព្រលឹមថ្ងៃទី២៤ ខែកក្កដា នៅពេលដែលទាហានពីភាគីទាំងសងខាងបានបើកការបាញ់ប្រហារគ្នានៅតាមបណ្តោយព្រំដែន។ កម្ពុជានៅតែបន្តអះអាងថា ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់៕
