ក្រុមហ៊ុនផលិតយន្តហោះខ្នាតយក្សអាមេរិក Boeing និងក្រុមហ៊ុនអាកាសចរណ៍ Korean Air ថ្មីៗនេះ បានប្រកាសពីកិច្ចព្រមព្រៀងដែលមានតម្លៃប្រហែល ៣៦ពាន់លានដុល្លារ សម្រាប់ការបញ្ជាទិញយន្តហោះ ១០៣ គ្រឿង។ នេះបើតាមការចុះផ្សាយពីសារព័ត៌មាន BBC។
យោងតាមសេចក្តីថ្លែងការណ៍មួយរបស់ក្រុមហ៊ុនទាំងពីរ បានបង្ហាញឲ្យដឹងថា កិច្ចព្រមព្រៀងនេះ រួមមានយន្តហោះដឹកអ្នកដំណើរប្រភេទ Boeing 787 , 777 និង 737 ។
ប្រធានក្រុមហ៊ុន Korean Air លោក Walter Cho បាននិយាយថា យន្តហោះថ្មីៗទាំងនេះ នឹងមកដល់ក្នុងពេលវេលាដ៏សំខាន់មួយ ដោយវានឹងធ្វើទំនើបកម្មកងហោះហើរជាតិរបស់កូរ៉េខាងត្បូង និងធានាបានថាវានៅតែមានការប្រកួតប្រជែងខ្ពស់ នៅលើទីផ្សារ។
ជម្រាបជូនថា កិច្ចព្រមព្រៀងនេះ ត្រូវបានប្រកាសនៅត្រឹមតែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីកូរ៉េខាងត្បុង លោក Lee Jae Myung បានជួបជាមួយប្រធានាធិបតីអាមេរិក លោក ដូណាល់ ត្រាំ នៅទីក្រុងវ៉ាស៊ីនតោន ដើម្បីពិភាក្សាអំពីពន្ធគយ ១៥% ដែលអាមេរិក ដាក់លើកូរ៉េ ក្នុងខែកក្កដា៕
