Meta ដែលជាក្រុមហ៊ុនមេរបស់ Facebook កាលពីថ្ងៃទី១២ ខែមករា បានប្រកាសតែងតាំងលោកស្រី Dina Powell McCormick ឲ្យឡើងកាន់តំណែងជាប្រធាន និងជាអនុប្រធានក្រុមហ៊ុន។ នេះបើតាមការចុះផ្សាយពីសារព័ត៌មាន CNBC។
លោកស្រី Powell McCormick បានចូលរួមជាមួយក្រុមប្រឹក្សាភិបាលរបស់ក្រុមហ៊ុន Meta កាលពីក្នុងខែមេសា ឆ្នាំមុន ប៉ុន្តែទោះជាយ៉ាងណាក៏ដោយលោកស្រី បានប្រកាសលាលែងចេញពីតំណែងវិញ នៅក្នុងខែធ្នូ។ នេះបើយោងតាមឯកសារដែលត្រូវបានដាក់ជូនគណៈកម្មការមូលបត្រ និងផ្សារហ៊ុនសហរដ្ឋអាមេរិក។
ប៉ុន្តែទោះជាយ៉ាងណាក៏ដោយ ក្រុមហ៊ុន Meta បានប្រកាសថា លោកស្រី Powell McCormick បានវិលត្រលប់មកកាន់ក្រុមហ៊ុនសារជាថ្មី ដោយនឹងបម្រើការជាសមាជិកនៃគណៈគ្រប់គ្រងក្រុមហ៊ុន ហើយនឹងជួយណែនាំយុទ្ធសាស្រ្ត និងការអនុវត្តរបស់ក្រុមហ៊ុនផងដែរ។
ទន្ទឹមនឹងនេះ លោក Mark Zuckerberg ដែលជានាយកប្រតិបត្តិរបស់ Meta បាននិយាយនៅក្នុងសេចក្តីថ្លែងការណ៍មួយថា ៖”យោងតាមបទពិសោធរបស់លោកស្រី Dina គឺស្ថិតនៅកម្រិតខ្ពស់បំផុតនៃហិរញ្ញវត្ថុសកល រួមផ្សំជាមួយនឹងទំនាក់ទំនងជ្រៅជ្រះរបស់លោកស្រីនៅជុំវិញពិភពលោក ដែលធ្វើឲ្យលោកស្រីស័ក្តិសមជាពិសេសក្នុងការជួយ Meta គ្រប់គ្រងដំណាក់កាលបន្ទាប់នៃការរីកចម្រើនរបស់ក្រុមហ៊ុន ក្នុងនាមជាប្រធាន និងជាអនុប្រធាន”។
ជម្រាបជូនថា មុនពេលចូលរួមជាមួយ Meta លោកស្រី Powell McCormick ធ្លាប់បានបម្រើការជាទីប្រឹក្សាសន្តិសុខជាតិរងរបស់ប្រធានាធិបតី ដូណាល់ ត្រាំ និងបានបម្រើការក្រោមការដឹកនាំរបស់លោកស្រី Condoleezza Rice រដ្ឋមន្ត្រីការបរទេសក្នុងអំឡុងរដ្ឋបាលរបស់អតីតប្រធានាធិបតី George W. Bush ផងដែរ៕
