ក្រុមហ៊ុនប្តូររូបិយប័ណ្ណគ្រីបតូខ្នាតយក្សរបស់កូរ៉េខាងត្បូង Bithumb បាននិយាយកាលពីចុងសប្តាហ៍មុនថា ខ្លួនបានផ្តល់កាក់ Bitcoin តម្លៃជាង ៤០ពាន់លានដុល្លារ ដោយចៃដន្យដល់អតិថិជន ព្រោះតែកំហុសបច្ចេកទេស។ នេះបើតាមការចុះផ្សាយពីសារព័ត៌មាន Reuters។
យ៉ាងណាមិញក៏ដោយ ក្រុមហ៊ុន Bithumb បានចេញសារសុំទោសចំពោះកំហុសនេះ ហើយបាននិយាយថា ខ្លួនបានទាញយកមកវិញ ៩៩,៧% នៃកាក់ Bitcoin សរុបចំនួន ៦២០,០០០ កាក់ ដែលមានតម្លៃប្រហែល ៤៤ពាន់លានដុល្លារគិតតាមតម្លៃលើទីផ្សារបច្ចុប្បន្ន។
គួរឲ្យដឹងផងដែរថា ជុំវិញហេតុការណ៍នេះ បានកើតឡើងនៅពេលក្រុមហ៊ុន Bithumb មានគម្រោងចែកជូនរង្វាន់ជាសាច់ប្រាក់តូចៗចំនួន ២ ០០០វ៉ុន (១,៤០) ឬច្រើនជាងនេះដល់អតិថិជនរបស់ខ្លួនម្នាក់ៗ ជាផ្នែកមួយនៃការផ្សព្វផ្សាយ ប៉ុន្តែដោយសារតែកំហុសបច្ចេកទេសអតិថិជន បែជាទទួលបានជាកាក់ Bitcoin យ៉ាងហោចណាស់ ២ ០០០ កាក់ ក្នុងម្នាក់ៗ ទៅវិញ។
មិនតែប៉ុណ្ណោះ Bithumb ថែមទាំងបាននិយាយនៅក្នុងសេចក្តីថ្លែងការណ៍មួយថា ថា៖”យើងចង់បញ្ជាក់ឲ្យច្បាស់ថា ឧប្បត្តិហេតុនេះមិនទាក់ទងនឹងការលួចចូលពីខាងក្រៅ ឬការរំលោភផ្នែកសុវត្ថិភាពទេ ហើយវាក៏ពាក់ព័ន្ធទៅនឹងបញ្ហាជាមួយប្រព័ន្ធសុវត្ថិភាព ឬការគ្រប់គ្រងទ្រព្យសម្បត្តិរបស់អតិថិជននោះដែរ”។
ជម្រាបជូនថាតម្លៃ Bitcoin បានធ្លាក់ចុះ ១៧% ក្នុងរយៈពេលខ្លី មកនៅត្រឹមជាង ៨១លានវ៉ុន (ជាង ៥៥០០០ដុល្លារ) ក្នុងមួយកាក់ គិតនៅល្ងាចថ្ងៃសុក្រសប្តាហ៍មុន នៅលើ Bithumb ។ ប៉ុន្តែក្រោយមកតម្លៃរបស់វាបានងើបឡើងវិញ ដោយការជួញដូរចុងក្រោយ នៅក្នុងតម្លៃជាង ១០៤លានវ៉ុន ឬជាង ៧១ ០០០ដុល្លារ ក្នុងមួយកាក់៕
