ទីភ្នាក់ងារថាមពលអន្តរជាតិ ថាពិភពលោកកំពុងជួបប្រទះនឹងកង្វះខាតប្រេងដ៏ធំបំផុត ក្នុងប្រវត្តិសាស្រ្ត

យោងតាមទីភ្នាក់ងារថាមពលអន្តរជាតិ (IEA) ថ្មីៗនេះ បានបង្ហាញឲ្យដឹងថា ពិភពលោកកំពុងប្រឈមមុខនឹងការរំខានដល់ការផ្គត់ផ្គង់ប្រេងដ៏ធំបំផុតមិនធ្លាប់មានដោយសារតែជម្លោះនៅមជ្ឈិមបូព៌ា។ នេះបើតាមការចុះផ្សាយពីសារព័ត៌មាន Reuters។

នៅថ្ងៃទី១២ ខែមីនា IEA បានរាយការណ៍ថា រដ្ឋឈូងសមុទ្របានកាត់បន្ថយការផលិតប្រេងយ៉ាងហោចណាស់ ១០ លានបារ៉ែលក្នុងមួយថ្ងៃដោយសារតែជម្លោះ។ តួលេខនេះគឺស្មើនឹងជិត ១០% នៃតម្រូវការប្រេងសកល។

ទីភ្នាក់ងារ IEA ក៏បានព្រមានផងដែរថា ប្រសិនបើការដឹកជញ្ជូនប្រេងមិនត្រូវបានស្តារឡើងវិញក្នុងពេលឆាប់ៗនេះទេ នោះកង្វះខាតការផ្គត់ផ្គង់នឹងកើនឡើង។ IEA បានបញ្ជាក់ទៀតថា ការផលិតប្រេងនៅក្នុងតំបន់ជម្លោះនេះ នឹងចំណាយពេលច្រើនសប្តាហ៍ ឬអាចឈានដល់ច្រើនខែ ដើម្បីត្រឡប់ទៅកម្រិតមុនវិបត្តិវិញ។

គួរឲ្យដឹងផងដែរថា កាលពីពេលថ្មីៗនេះ IEA បានប្រកាសថា ប្រទេសជាសមាជិករបស់ខ្លួន នឹងបញ្ចេញប្រេងចំនួន ៤០០ លានបារ៉ែលពីទុនបម្រុងរបស់ពួកគេ ដើម្បីធ្វើឲ្យទីផ្សារពិភពលោកស្ងប់។ ក្នុងចំណោមចំនួននោះ សហរដ្ឋអាមេរិកតែមួយនឹងបញ្ចេញប្រេងចំនួន ១៧២ លានបារ៉ែល។ នេះគឺជាការអន្តរាគមន៍ដ៏ធំបំផុតនៅក្នុងប្រវត្តិសាស្ត្ររបស់អង្គការ។

ជម្រាបជូនថា ជម្លោះនៅមជ្ឈិមបូព៌ាស្ទើរតែបានបិទច្រកសមុទ្រ Hormuz ដោយបានកាត់បន្ថយការផ្គត់ផ្គង់ប្រេងសកលប្រហែល ៨ លានបារ៉ែលក្នុងមួយថ្ងៃ។ ច្រកសមុទ្រ Hormuz គឺមានសារៈសំខាន់ខ្លាំង ព្រោះវាស្ថិតនៅចន្លោះប្រទេសអូម៉ង់ និងអ៊ីរ៉ង់ ដោយភ្ជាប់ឈូងសមុទ្រពែរ្សទៅភាគខាងជើង ឈូងសមុទ្រអូម៉ង់ទៅភាគខាងត្បូង និងតភ្ជាប់បន្ថែមទៀតទៅកាន់សមុទ្រអារ៉ាប់៕​