ប្រធានាធិបតីអាម៉េរិក លោក ដូណាល់ ត្រាំ បានគំរាមកម្ទេចមជ្ឈមណ្ឌលនាំចេញប្រេងដ៏សំខាន់របស់អ៊ីរ៉ង់នៅកោះ Kharg រួមទាំងអណ្តូងប្រេង, រោងចក្រផលិតអគ្គិសនី និងហេដ្ឋារចនាសម្ព័ន្ធស៊ីវិលផ្សេងៗទៀត ប្រសិនបើប្រទេសនេះ មិនយល់ចុះកិច្ចព្រមព្រៀង ដើម្បីបញ្ចប់សង្គ្រាមក្នុងពេលឆាប់ៗនេះទេ។
ប្រធានាធិបតីអាមេរិករូបនេះ បានថ្លែងថ្ងៃទី៣០ ខែមីនាថា «ប្រសិនបើក្នុងហេតុផលណាមួយ ដែលកិច្ចព្រមព្រៀងមិនអាចសម្រេចបានក្នុងពេលឆាប់ៗនេះ ហើយប្រសិនបើច្រកសមុទ្រ Hormuz មិនត្រូវបានបើកដំណើរការជាធម្មតាភ្លាមៗទេនោះ យើងនឹងបំផ្ទុះ និងកម្ទេចចោលទាំងស្រុងនូវរោងចក្រផលិតអគ្គិសនី, អណ្តូងប្រេង និងកោះ Kharg ហើយអាចរួមបញ្ចូលទាំងរោងចក្រចម្រោះទឹកស្អាតទាំងអស់ផងដែរ»។
ទន្ទឹមគ្នានេះ អ្នកនាំពាក្យសេតវិមាន លោកស្រី Karoline Leavitt បានបញ្ជាក់សាជាថ្មីនូវការទទូចដល់រដ្ឋបាលអាម៉េរិកថា សង្គ្រាមរបស់សហរដ្ឋអាម៉េរិកប្រឆាំងនឹងអ៊ីរ៉ង់ គួរតែត្រូវបានបញ្ចប់ក្នុងរយៈពេលពីរសប្តាហ៍ទៀត។ លោកស្រីបន្តថា លោក ត្រាំ តែងតែបញ្ជាក់ថា កាលវិភាគដែលបានប៉ាន់ប្រមាណទុក គឺចន្លោះពី ៤ ទៅ ៦សប្តាហ៍ដើម្បីបញ្ចប់សង្គ្រាម ប៉ុន្តែថ្ងៃនេះគឺជាថ្ងៃទី ៣០ហើយ ដូច្នេះ អ្នកអាចគណនាដោយខ្លួនឯងបាន៕
