អ៊ីរ៉ង់ បានអះអាងថាការផ្អាកគម្រោងរំដោះកប៉ាល់ចេញពីច្រកសមុទ្រ Hormuz ឬហៅថា “Freedom Project” របស់ប្រធានាធិបតីអាមេរិក លោក ដូណាល់ ត្រាំ គឺជារឿងបរាជ័យ ដោយសារតែមានការប្រកាសជំហរដ៏តឹងរ៉ឹងពីទីក្រុងតេអេរ៉ង់ ហើយសហរដ្ឋអាមេរិក បានបរាជ័យក្នុងការសម្រេចគោលដៅដែលខ្លួនបានប្រកាសនេះ។
យោងតាមទីភ្នាក់ងារសារព័ត៌មាន ISNA បាននិយាយនៅថ្ងៃទី៦ ខែឧសភាថា ប្រធានាធិបតីអាមេរិក លោក ត្រាំ ត្រូវបានធ្វើការសម្រេចចិត្តជាថ្មីម្តងទៀតចំពោះប្រតិបត្តិការ “Freedom Project” របស់ខ្លួន ដោយសារតែជំហររបស់អ៊ីរ៉ង់។ ហើយផែនការជួយរំដោះកប៉ាល់ដែលកំពុងជាប់គាំងនៅច្រកសមុទ្រ Hormuz ដែលប្រកាសចេញដោយមេដឹកនាំអាមេរិករូបនេះ គឺត្រូវបានបរាជ័យដោយសារតែជំហរដ៏ម៉ឺងម៉ាត់របស់ទីក្រុងតេអេរ៉ង់។
ទន្ទឹមនឹងនេះ ទីភ្នាក់ងារសារព័ត៌មាន Tasnim របស់អ៊ីរ៉ង់ ក៏បានរាយការណ៍អំពីចលនារបស់ប្រធានាធិបតីអាមេរិក នៅថ្ងៃដដែលនេះ ជាមួយនឹងចំណងជើងថា «លោក ត្រាំ ត្រូវតែដកថយ»។
គួរឲ្យដឹងថា របាយការណ៍ព័ត៌មានទាំងនេះ ត្រូវបានចេញផ្សាយប៉ុន្មានម៉ោង បន្ទាប់ពី លោក ត្រាំ បានប្រកាសពីការផ្អាកប្រតិបត្តិការ “Freedom Project” របស់ខ្លួន ដែលជាយុទ្ធនាការមួយដើម្បីជួយកប៉ាល់ឆ្លងកាត់ច្រកសមុទ្រ Hormuz ដោយសុវត្ថិភាព និងមានគោលបំណងជំរុញកិច្ចខិតខំប្រឹងប្រែងក្នុងការចរចា និងឈានដល់កិច្ចព្រមព្រៀងជាមួយអ៊ីរ៉ង់។
យ៉ាងណាមិញ ប្រធានាធិបតីអ៊ីរ៉ង់ លោក Masoud Pezeshkian បាននិយាយផងដែរថា អ៊ីរ៉ង់នៅតែត្រៀមខ្លួនរួចជាស្រេចសម្រាប់ការសន្ទនា ប៉ុន្តែបានសង្កត់ធ្ងន់ថា ការទាមទាររបស់ទីក្រុងវ៉ាស៊ីនតោន ក្នុងការដាក់សម្ពាធអតិបរមាលើទីក្រុងតេអេរ៉ង់គឺរឿងមិនអាចទទួលយកបានឡើយ។
គួរជម្រាបជូនថា “Freedom Project” គឺជាយុទ្ធនាការមួយដើម្បីជួយនាវាពាណិជ្ជកម្មឆ្លងកាត់ច្រកសមុទ្រ Hormuz ដែលបានចាប់ផ្តើមដោយសហរដ្ឋអាមេរិក នៅថ្ងៃទី៤ ខែឧសភា។ ប៉ុន្តែទោះជាយ៉ាងណា កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) អះអាងថាយុទ្ធនាការនេះ រំលោភលើបទឈប់បាញ់ ហើយបានសងសឹកដោយការដាក់ពង្រាយមីស៊ីលបញ្ជាទិស យន្តហោះគ្មានមនុស្សបើក (UAV) និងទូកអត្តឃាតដែលកំណត់គោលដៅនាវាដែលឆ្លងកាត់ច្រកសមុទ្រ Hormuz៕
