តម្លៃប្រេងឆៅអន្តរជាតិ បានធ្លាក់ចុះនៅថ្ងៃទី៤ មិថុនានេះ ខណៈកិច្ចព្រមព្រៀងបទឈប់បាញ់រវាងអ៊ីស្រាអែល និងលីបង់បានជំរុញក្តីសង្ឃឹមសម្រាប់កិច្ចព្រមព្រៀងទូលំទូលាយមួយ ដើម្បីឈានទៅរកការបញ្ចប់សង្គ្រាមរវាងសហរដ្ឋអាមេរិក និងអ៊ីស្រាអែលជាមួយអ៊ីរ៉ង់ ដែលអាចនាំឲ្យមានការបើកច្រកសមុទ្រ Hormuz ឡើងវិញ។ នេះបើតាមការចុះផ្សាយពីសារព័ត៌មាន Reuters ។
គិតត្រឹមការជួញដូរចុងក្រោយ តម្លៃប្រេងឆៅប្រភេទ Brent បានធ្លាក់ចុះ ៨៧សេន ឬ ០,៨៩% មកនៅត្រឹម ៩៦,៩២ដុល្លារក្នុងមួយបារ៉ែល ខណៈប្រេងឆៅប្រភេទ West Texas Intermediate (WTI) របស់សហរដ្ឋអាមេរិកបានធ្លាក់ចុះ ៧៨សេន ឬ ០,៨១% មកនៅត្រឹម ៩៥,២៤ដុល្លារ បន្ទាប់ពីមានការកើនឡើងនៅដើមសប្តាហ៍នេះ។
នៅមុនការប្រកាសនេះ ទាំងប្រេងឆៅប្រភេទ Brent និង WTI បានកើនឡើងប្រហែល ២% បន្ទាប់ពីមានការផ្ទុះនៃជម្លោះនៅមជ្ឈិមបូព៌ាឡើងវិញ រួមទាំងការវាយប្រហាររបស់អ៊ីរ៉ង់លើប្រទេសគុយវ៉ែត និងការវាយប្រហារដោយយោធារបស់សហរដ្ឋអាមេរិក នៅជិតច្រកសមុទ្រ Hormuz ផងដែរ។
យ៉ាងណាមិញ អ៊ីស្រាអែល និងលីបង់ បាននិយាយនៅយប់ថ្ងៃពុធថា ពួកគេបានយល់ព្រមអនុវត្តបទឈប់បាញ់ ដោយបង្កើនក្តីសង្ឃឹមសម្រាប់កិច្ចព្រមព្រៀងរវាងទីក្រុងវ៉ាស៊ីនតោន និងទីក្រុងតេអេរ៉ង់ ដែលបានកំណត់លក្ខខណ្ឌនៃកិច្ចព្រមព្រៀងណាមួយ ដោយផ្អែកលើការបញ្ចប់ការប្រយុទ្ធគ្នារវាងអ៊ីស្រាអែល និងលីបង់។
ទន្ទឹមនឹងនេះប្រធានាធិបតីអាមេរិក លោក ដូណាល់ ត្រាំ បានស្នើកាលពីថ្ងៃពុធថា អាចមានវឌ្ឍនភាពក្នុងការចរចាជាមួយអ៊ីរ៉ង់ ឱ្យបានឆាប់តាមដែលអាចធ្វើទៅបាននៅចុងសប្តាហ៍នេះ ដោយបង្ហាញក្តីសង្ឃឹមថាជម្លោះអាចនឹងបញ្ចប់ទាំងស្រុង៕
