អនុរដ្ឋមន្ត្រីការបរទេសអ៉ីរ៉ង់ លោក Kazem Gharibabadi បាននិយាយថា អ៉ីរ៉ង់នឹងប្រើប្រាស់ផ្នែកមួយនៃទ្រព្យសម្បត្តិចំនួន ៦ពាន់លានដុល្លារដែលត្រូវបានបង្កកនៅក្នុងប្រទេសកាតា ដើម្បីទិញទំនិញសំខាន់ៗ សម្រាប់ប្រទេសរបស់ខ្លួន។ នេះបើតាមការចុះផ្សាយពីសារព័ត៌មាន AFP។
លោក Gharibabadi បាននិយាយនៅថ្ងៃទី១ ខែកក្កដាថា នៅក្នុងកិច្ចប្រជុំជាមួយមន្ត្រីកាតា រួមទាំងតំណាងមកពីធនាគារកណ្តាល ភាគីទាំងពីរបានពិភាក្សាអំពីវិធីប្រើប្រាស់ផ្នែកមួយនៃទ្រព្យសម្បត្តិចំនួន ៦ពាន់លានដុល្លារដំបូងដែលត្រូវបានបញ្ចេញ បន្ទាប់ពីត្រូវបានបង្កកទុកអស់រយៈពេលជាយូរ។
មិតតែប៉ុណ្ណោះ អនុរដ្ឋមន្ត្រីការបរទេសរូបនេះបានមានប្រសាសន៍ទៀតថា ៖”ភាគីទាំងពីរបានឯកភាពគ្នាថា ដោយផ្អែកលើតម្រូវការដែលយើងបានស្នើឡើង ទំនិញសំខាន់ៗមួយចំនួននឹងត្រូវបានទិញ និងដឹកជញ្ជូនទៅកាន់អ៉ីរ៉ង់”។
គួរឲ្យដឹងថាមូលនិធិដែលលោក Gharibabadi បានលើកឡើងគឺជាផ្នែកមួយនៃប្រាក់ចំណូលប្រេងរបស់អ៉ីរ៉ង់ ដែលត្រូវបានផ្ទេរពីកូរ៉េខាងត្បូងទៅកាន់គណនីចូលប្រើប្រាស់ដែលមានការរឹតត្បិតនៅក្នុងប្រទេសកាតា ដោយចាប់ផ្តើមនៅឆ្នាំ២០២៣ មក។ ហើយកាលពីថ្ងៃទី២៩ ខែមិថុនា ប្រធានាធិបតីអ៉ីរ៉ង់ លោក Masoud Pezeshkian ក៏បានប្រកាសផងដែរថា កាតានឹងយល់ព្រមបញ្ចេញទ្រព្យសម្បត្តិចំនួន ៦ពាន់លានដុល្លារក្នុងចំណោមទ្រព្យសម្បត្តិសរុបចំនួន ១២ពាន់លានដុល្លាររបស់អ៉ីរ៉ង់ដែលត្រូវបានបង្កកនៅក្នុងប្រទេសរបស់ខ្លួន។
ជម្រាបជូនថា យោងតាមអនុស្សរណៈដែលបានចុះហត្ថលេខានៅពាក់កណ្តាលខែមិថុនាកន្លងទៅ សហរដ្ឋអាមេរិកបានយល់ព្រមអនុញ្ញាតឱ្យអ៉ីរ៉ង់ចូលប្រើប្រាស់ទ្រព្យសម្បត្តិដែលត្រូវបានបង្កក ឬដាក់កម្រិតជាផ្នែកមួយនៃការអនុវត្តកិច្ចព្រមព្រៀង។ ទោះជាយ៉ាងណាក៏ដោយ យន្តការចែកចាយ របៀបដែលមូលនិធិនឹងត្រូវបានប្រើប្រាស់ និងពេលវេលានៃការអនុវត្តមិនទាន់ត្រូវបានប្រកាសនៅឡើយទេ៕
