នៅថ្ងៃអង្គារទី ១៥ មីនា ២០២២ នេះ រដ្ឋាភិបាលនៃប្រទេសប៉ូឡូញបានទម្លាយឲ្យដឹងថា ថ្នាក់ដឹកនាំកំពូលនៃប្រទេស ៣ នៅតំបន់អឺរ៉ុប នឹងធ្វើដំណើរទៅកាន់ទីក្រុង Kyiv ដើម្បីជួបជាមួយនឹងប្រធានាធិបតីអ៊ុយក្រែន Volodymyr Zelensky និងនាយករដ្ឋមន្ត្រី Denis Shmyhal។
នៅក្នុងរបាយការណ៍ដែលបញ្ចេញដោយរដ្ឋាភិបាលប៉ូឡូញបានឲ្យដឹងទៀតថា នាយករដ្ឋមន្ត្រី Mateusz Morawiecki, ឧបនាយករដ្ឋមន្ត្រី Jarosław Kaczyński, នាយករដ្ឋមន្ត្រីនៃសាធារណរដ្ឋឆែក Petr Fiala និងនាយករដ្ឋមន្ត្រីនៃស្លូវេនី Janez Janša នឹងធ្វើដំណើរទស្សនកិច្ចទៅកាន់រដ្ឋធានីអ៊ុយក្រែន ក្នុងនាមជាតំណាងនៃក្រុមប្រឹក្សាតំបន់អឺរ៉ុប។
“ដំណើរទស្សនកិច្ចមួយនេះគឺរៀបចំឡើង បន្ទាប់ពីការពិភាក្សាជាមួយនឹងប្រធានក្រុមប្រឹក្សាភិបាលតំបន់អឺរ៉ុប Charles Michel និងប្រធានគណៈកម្មការអឺរ៉ុប Ursula von de Leyen”។ នេះបើតាមអំណះអំណាងដែលមាននៅក្នុងរបាយការណ៍។
“គោលបំណងនៃដំណើរទស្សនកិច្ចមួយនេះ គឺដើម្បីបញ្ជាក់ពីការគាំទ្ររបស់សហភាពអឺរ៉ុបចំពោះអធិបតេយ្យភាព និងឯករាជ្យភាពរបស់អ៊ុយក្រែន ខណៈគោលបំណងមួយទៀតគឺនាំយកកញ្ចប់ជំនួយទៅកាន់ប្រទេស និងប្រជាជនអ៊ុយក្រែនដោយផ្ទាល់”៕
ប្រភព: CNN
