ប្រធានាធិបតី Joe Biden ប្រកាស​ផែនការ​ទារ​ពន្ធ​មហាសេដ្ឋី​អាមេរិក​នៅ​ឆ្នាំ ២០២៣

អន្តរជាតិ

កាលពី​ព្រឹក​ថ្ងៃច័ន្ទ​កន្លងទៅ ប្រធានាធិបតី​ Joe Biden បាន​ប្រកាស​ពី​គម្រោង​ចំណាយ​សម្រាប់​ឆ្នាំ ២០២៣ ដែល​ក្នុង​នោះ​លោក​ក៏​បាន​ប្រកាស​ដែរ​ថា ផែនការ​ទារ​ពន្ធ​ពី​មហាសេដ្ឋី​អាមេរិក​នឹង​កើតមាន​ឡើង។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ទន្ទឹម​នឹង​នោះ សារព័ត៌មាន Washington Post និង​តាម​ការ​ឲ្យ​ដឹង​តាម​រយៈ​ឯកសារ​រដ្ឋបាល​ផ្ទៃក្នុង​បាន​ទម្លាយ​ថា គម្រោង​ទារ “ពន្ធ​ចំណូល​ទាប​បំផុត​របស់​មហាសេដ្ឋី” នឹង​នឹងបង្កើតអត្រាពន្ធអប្បបរមា ២០% លើគ្រួសារអាមេរិកទាំងអស់ដែលមានតម្លៃលើសពី ១០០ លានដុល្លារ។

នេះ​ក៏​មាន​ន័យ​ថា ប្រាក់ពន្ធ​ភាគច្រើន​នឹង​បាន​មក​ពី​ពួក​មហាសេដ្ឋី​ដែល​ស្ថិតនៅ​ក្រោម​ការ​ឃ្លាំមើល​ពី​រដ្ឋាភិបាល​ដែល​មាន​បំណង​ចង់​គេចពន្ធ​តាម​មធ្យោបាយ​ផ្សេងៗ និង​ជា​គោលដៅ​របស់​សាធារណជន​ផង​ដែរ។

ប្រភព​ខាងលើ​បាន​អះអាង​ទៀត​ថា ផែនការ​មួយ​នេះ​នឹង​ក្លាយជា​ការ​ទារ​ពន្ធ​លើ​មហាសេដ្ឋី​ជាង ៧០០ នាក់​នៅ​អាមេរិក​លើក​ដំបូង​បំផុត ស្របពេលការិយាល័យគ្រប់គ្រង និងថវិការបស់សេតវិមាន និងក្រុមប្រឹក្សានៃទីប្រឹក្សាសេដ្ឋកិច្ចបានប៉ាន់ប្រមាណថា មហាសេដ្ឋីអាមេរិកចំនួនជាង ៤០០ គ្រួសារបានបង់ពន្ធសហព័ន្ធជាមធ្យមប្រហែល ៨% នៃប្រាក់ចំណូលរបស់ពួកគេចន្លោះឆ្នាំ ២០១០ និង ២០១៨ ពោលគឺទាបជាងប្រជាជនអាមេរិករាប់លាននាក់ដែលមិនសូវមានទ្រព្យសម្បត្តិច្រើន។

សារព័ត៌មាន​អាមេរិក​មួយ​នេះ​ថែម​ទាំង​បញ្ជាក់​ទៀត​ថា បើ​យោង​តាម​ឯកសារ​រដ្ឋបាល គឺ​ពួកគេ​នឹង​ទាមទារ​ពន្ធ​នៃ​ប្រាក់ចំណូល​ពី​មហាសេដ្ឋី​អាមេរិក​យ៉ាងហោចណាស់ ២០% នៃ​ប្រាក់​ចំណូល​សរុប​របស់​ពួកគេ និង​ធានា​ថា​ក្រុមមហាសេដ្ឋី​នឹង​លែង​បង់ពន្ធ​ទាប​ជាង​គ្រូបង្រៀន និង​អ្នក​ពន្លត់​អគ្គិភ័យ​ទៀត​ហើយ។

បញ្ជាក់​ដែរ​ថា កន្លង​មក​ការ​ទាមទារ​ពន្ធ​ទៅ​លើ​ក្រុម​មហាសេដ្ឋី​អាមេរិក​គឺ​ហាក់​មាន​ចន្លោះ​ប្រហោង​ខ្លាំង ដែល​ធ្វើ​ឲ្យ​ក្រុម​មហាជន និង​បក្ស​ប្រឆាំង​តែងតែ​បង្ហាញ​ការ​មិនពេញ​ចិត្ត​ត្រង់​ចំណុច​នេះ​របស់​រដ្ឋាភិបាល៕

ប្រភព: Theguardian