ជាទូទៅតំណែងជាសមាជិកក្រុមប្រឹក្សាភិបាលនៃក្រុមហ៊ុនធំៗតែងតែប្រគល់ជូនដល់បុគ្គលដែលមានតំណែងខ្ពស់នៃក្រុមហ៊ុន ស្ថាបនិក ឬសហស្ថាបនិកនៃក្រុមហ៊ុន និងបុគ្គលដែលមានភាគហ៊ុនធំបំផុតប្រចាំក្រុមហ៊ុន ហើយតំណែងជាសមាជិកនៃក្រុមប្រឹក្សាភិបាលពិតជាសំខាន់ណាស់ ដោយសារស្ទើរតែគ្រប់ការសម្រេចចិត្តធំៗតម្រូវឲ្យឆ្លងកាត់ការយល់ព្រមពីពួកគេជាមុន។
យ៉ាងណា សម្រាប់មហាសេដ្ឋីអាមេរិក Elon Musk បែរជាមិនខ្វាយខ្វល់ជាមួយមុខតំណែងខាងលើ ដោយបានបដិសេធមិនព្រមក្លាយជាសមាជិកនៃក្រុមប្រឹក្សាភិបាលរបស់ Twitter ឡើយ បើទោះជាលោកមានភាគហ៊ុនធំបំផុតប្រចាំក្រុមហ៊ុនបណ្ដាញសង្គមយក្សមួយនេះក្ដី។
បើយោងតាមការទម្លាយឲ្យដឹងពី CEO នៃ Twitter គឺលោក Parag Agrawal បានឲ្យដឹងថា Elon Musk ដែលមានភាគហ៊ុន ៩,២% ធំបំផុតនៃក្រុមហ៊ុនត្រូវបានផ្ដល់សំណើឲ្យក្លាយជាសមាជិកក្រុមប្រឹក្សាភិបាល ប៉ុន្តែមហាសេដ្ឋីមានបំផុតលើលោកបានបដិសេធចំពោះតួនាទីមួយនេះ។
ដោយឡែកការសម្រេចចិត្តរបស់ Elon Musk គឺបានធ្វើឲ្យអ្នកប្រើប្រាស់បណ្ដាញសង្គមខាងលើមានការភ្ញាក់ផ្អើលជាខ្លាំង ដ្បិតកន្លងមកលោកធ្លាប់បង្ហើបថា ចង់កែប្រែច្បាប់ប្រើប្រាស់នៃ Twitter មួយចំនួនដូចជាការបញ្ចេញមតិដោយសេរីជាដើម ហើយការក្លាយជាសមាជិកក្រុមប្រឹក្សាភិបាលគឺជាចំណុចសំខាន់បំផុត បើសិនជាស្ថាបនិក SpaceX ចង់សម្រេចបំណងខាងលើ។
យ៉ាងណា ចំពោះមូលហេតុពិតប្រាកដនៅពីក្រោយការសម្រេចចិត្តដ៏នឹកស្មានមិនដល់មួយនេះ គឺមិនត្រូវបានទម្លាយឲ្យដឹងឡើយ ដោយបច្ចុប្បន្ន Elon Musk ក៏មិនបកស្រាយអ្វីទាក់ទងនឹងបញ្ហានេះ ស្របពេលនាយកប្រតិបត្តិ Twitter ក៏មិនអាចផ្ដល់ព័ត៌មានសំខាន់ទាក់ទងនឹងរឿងនេះដូចគ្នា៕
ប្រភព: Economictimes
