រដ្ឋមន្ត្រីការបរទេសអ៊ីរ៉ង់ លោក Abbas Araghchi កាលពីពេលថ្មីៗនេះ បានជួបពិភាក្សាជាមួយសមភាគីចិន ដោយលើកសរសើរទំនាក់ទំនងនេះ និងថ្លែងអំណរគុណដល់ទីក្រុងប៉េកាំងចំពោះជំហររបស់ពួកគេលើជម្លោះនៅមជ្ឈិមបូព៌ា។ នេះបើតាមការចុះផ្សាយពីសារព័ត៌មាន AFP។
រដ្ឋមន្ត្រីការប្រទេសចិន លោក Wang Yi បានជួបពិភាក្សាជាមួយសមភាគីអ៊ីរ៉ង់ លោក Abbas Araghchi នៅទីក្រុងប៉េកាំង នៅថ្ងៃទី៧ ខែមេសានេះ ដោយបញ្ជាក់ថា ការបញ្ចប់ជម្លោះអ៊ីរ៉ង់ទាំងស្រុង ត្រូវតែសម្រេចបានភ្លាមៗ ហើយការបន្តជម្លោះឡើងវិញគឺជារឿងមិនអាចទទួលយកបាន។
ប្រមុខការទូតរបស់ប្រទេសចិនរូបនេះ ក៏បានបន្ថែមទៀតថា ការចរចាដោយផ្ទាល់រវាងភាគីពាក់ព័ន្ធ នៅតែចាំបាច់ ដើម្បីឈានទៅរកការបញ្ចប់ជម្លោះរយៈពេលវែង។
មិនតែប៉ុណ្ណោះ លោក Wang បានននិយាយថា ៖” ប្រទេសចិននឹងខិតខំប្រឹងប្រែងបន្ថែមទៀត ដើម្បីកាត់បន្ថយភាពតានតឹង និងបញ្ចប់ជម្លោះ បន្តគាំទ្រការចាប់ផ្តើមកិច្ចចរចាសន្តិភាព និងដើរតួនាទីកាន់តែធំក្នុងការស្តារសន្តិភាព និងស្ថិរភាពឡើងវិញនៅមជ្ឈិមបូព៌ា។
ទន្ទឹមនឹងនេះ ប្រមុខការទូតអ៊ីរ៉ង់ លោក Aragchi ក៏បានថ្លែងអំណរគុណដល់ប្រទេសចិន ចំពោះជំហរខ្លួន។ លោកថែមទាំងបាននិយាយថា ទីក្រុងប៉េកាំងគឺជាមិត្តស្មោះត្រង់របស់ទីក្រុងតេអេរ៉ង់ ហើយកិច្ចសហប្រតិបត្តិការរវាងប្រទេសទាំងពីរ នឹងត្រូវបានពង្រឹងបន្ថែមទៀត នៅក្នុងស្ថានភាពបច្ចុប្បន្ន។
គួរជម្រាបជូនផងដែរថា យោងតាមសារព័ត៌មាន AFP ទីក្រុងប៉េកាំងត្រូវបានគេជឿថាបានចូលរួមដោយស្ងាត់ៗ ក្នុងកិច្ចខិតខំប្រឹងប្រែងដើម្បីដោះស្រាយវិបត្តិរបស់អ៊ីរ៉ង់អស់រយៈពេលជាច្រើនសប្តាហ៍។ កិច្ចខិតខំប្រឹងប្រែងផ្នែកការទូតរបស់ខ្លួននេះ ក៏ត្រូវបានគេកត់សម្គាល់ថាបានដើរតួនាទីយ៉ាងសំខាន់នៅក្នុងកិច្ចព្រមព្រៀងឈប់បាញ់រវាងទីក្រុងវ៉ាស៊ីនតោន និងទីក្រុងតេអេរ៉ង់ ដែលបានចូលជាធរមាន កាលពីថ្ងៃទី៨ ខែមេសាកន្លងទៅផងដែរ៕
