កាលពីពេលកន្លងទៅ មានដំណឹងលេចលឺមកថា ប្រធានាធិបតីរុស្ស៊ី Vladimir Putin កំពុងមានបញ្ហាសុខភាពធ្ងន់ធ្ងរ អាចនឹងតម្រូវឲ្យមានការវះកាត់ជាបន្ទាន់ទៀតផង ខណៈចចាមអារ៉ាមទាំងនោះសុទ្ធតែអះអាងថា ថ្នាក់ដឹកនាំខាងលើកំពុងមានជំងឺមហារីក។
ដោយឡែក បើយោងតាមការចុះផ្សាយពីសារព័ត៌មានក្រៅស្រុកមួយចំនួនបានឲ្យដឹងថា Putin នឹងចាត់តាំងបុគ្គលម្នាក់សម្រាប់ដើរតួនាទីជំនួសលោក ពោលគឺគ្រប់គ្រងរដ្ឋាភិបាលរុស្ស៊ីទាំងមូល បើសិនជាមេដឹកនាំមហាអំណាចមួយនេះត្រូវទទួលការសម្រាកព្យាបាលជំងឺមហារីក។
ទន្ទឹមនឹងនោះ ឆាណែលតេឡេក្រាមមានឈ្មោះ General SVR ដែលគ្រប់គ្រងដោយអតីតឧត្តមសេនីយផ្នែកស៊ើបការណ៍បរទេសរុស្ស៊ីដែលគេស្គាល់ដោយរហស្សនាម “Viktor Mikhailovich” បានបញ្ជាក់យ៉ាងច្បាស់ថា Putin នឹងផ្ទេរសិទ្ធគ្រប់គ្រងប្រទេសបណ្ដោះអាសន្នទៅឲ្យលោក Nikolai Patrushev ប្រធានក្រុមប្រឹក្សាសន្តិសុខរបស់ប៉ូលីសសហព័ន្ធរុស្ស៊ី អំឡុងពេលប្រធានាធិបតីរូបនេះកំពុង និងសម្រាកក្រោយធ្វើការវះកាត់។
ប្រភពដដែលបានឲ្យដឹងទៀតថា ការវះកាត់ និងពេលវេលាសម្រាកដើម្បីជះសះស្បើយនៅមិនទាន់បញ្ជាក់ច្បាស់នៅឡើយ គ្រាន់តែគេរំពឹងថា វានឹងមានរយៈពេលខ្លីមួយ ស្របពេលឆាណែលខាងលើសង្កត់ធ្ងន់ថា ក្រុមគ្រូពេទ្យដាក់កំហិតថា ពូទីនត្រូវតែធ្វើការវះកាត់។
មិនត្រឹមតែប៉ុណ្ណោះ ពួកគេថែមទាំងអះអាងទៀតថា ពូទីនបានជួបជជែកជាមួយ Patrushev ដោយផ្ទាល់រយៈពេល ២ ម៉ោងកាលពីថ្ងៃព្រហស្បតិ៍ ហើយប្រធានបទនៃការជួបជជែកគ្នានោះ ទំនងជាការឲ្យតម្រុយទាក់ទងនឹងបញ្ហាសុខភាពរបស់ថ្នាក់ដឹកនាំខាងលើ។
“ពួកយើងដឹងថា Putin បានឲ្យសញ្ញាទៅ Patrushev ដោយអាចសន្និដ្ឋានបាន លោកចាត់ទុកគាត់ (Patrushev) ជាមិត្តដែលអាចទុកចិត្តបានតែម្នាក់គត់នៅជួររដ្ឋាភិបាល។ លើសពីនេះ ប្រធានាធិបតីបានសន្យាថា បើសិនជាបញ្ហាសុខភាពរបស់លោកកាន់តែធ្ងន់ធ្ងរ នោះការគ្រប់គ្រងប្រទេសជាបណ្ដោះអាសន្ននឹងធ្លាក់ទោក្នុងកណ្ដាប់ដៃ Patrushev”។
យ៉ាងណា ចចាមអារ៉ាមខាងលើត្រូវបានច្រានចោលដោយរដ្ឋាភិបាលនៃប្រទេសរុស្ស៊ី ដោយពួកគេអះអាងថា ប្រធានាធិបតីពូទីនពុំមានបញ្ហាសុខភាពធ្ងន់ធ្ងរដល់ថ្នាក់ត្រូវវះកាត់នោះឡើយ៕
ប្រភព: Nypost
