កាលពីពេលថ្មីៗនេះ ក្រុមហ៊ុន Tesla បានទម្លាយថា ពួកគេបានចាប់ផ្ដើមប្រកាសលក់រថយន្តអគ្គិសនី ២ ម៉ូដែលនៅប្រទេសថៃ ហើយវាក៏ជាជំហានដំបូងដែលក្រុមហ៊ុនអាមេរិក ប្រឡូកចូលទីផ្សាររថយន្តដែលជប៉ុនធ្លាប់គ្រប់គ្រងយូរណាស់មកហើយ។
យោងតាមរបាយការណ៍ចុះផ្សាយដោយ CNA បានបង្ហាញថា រថយន្តអគ្គិសនី ២ ម៉ូដែលដែល Tesla បានដាក់លក់នោះគឺ មានតម្លៃចន្លោះពី ១,៧ លានបាត ដល់ ២,៥ លានបាត ឬប្រមាណ ៤៨ ៥០០ ដល់ ៧១ ២០០ ដុល្លារអាមេរិក ស្របពេលរដ្ឋាភិបាលថៃក៏កំពុងជំរុញឲ្យប្រជាពលរដ្ឋងាកមកប្រើប្រាស់រថយន្តអគ្គិសនីផង ដោយបន្ធូរបន្ថយលើពន្ធនាំចូល និងពន្ធផ្លូវជាដើម។
ក្រុមហ៊ុន Tesla បានចាប់ផ្ដើមទទួលការកុម្ម៉ង់តាមអ៊ីនធឺណិត និងដឹកជញ្ជូនដល់អតិថិជននាដើមឆ្នាំក្រោយ ប៉ុន្តែនៅចាញ់ប្រៀបគូប្រជែងផ្សេងទៀតដូចជា BYD និង Great Wall Motors គឺមានទីស្នាក់ការស្រាប់នៅប្រទេសមានសេដ្ឋកិច្ចធំទី ២ ប្រចាំអាស៊ាន ស្របពេលក្រុមហ៊ុនទាំង ២ ក៏មានរថយន្តអគ្គិសនីច្រើនជម្រើស តម្លៃវិញក៏ធូរថ្លៃជាង Tesla ពោលមានតម្លៃចាប់ពី ៨ សែនបាត។
សូមជម្រាបដែរថា ប្រទេសថៃ គឺជាមជ្ឈមណ្ឌលធំបំផុតទី ៤ ដែលក្រុមហ៊ុនរថយន្តធំៗដូចជា Toyota Motor Corp និង Honda Motor Co Ltd បោះទីតាំងនៅទីនោះ ខណៈរថយន្តប្រហែល ១,៥ ដល់ ២ លានគ្រឿង ត្រូវបានផលិតឡើងនៅប្រទេសថៃជារៀងរាល់ឆ្នាំ ហើយពាក់កណ្ដាលនៃចំនួននោះគឺ ត្រូវនាំចេញទៅក្រៅប្រទេស៕
