កាលពីសប្ដាហ៍កន្លងទៅ ប្រធានាធិបតីចិន និងរដ្ឋមន្ត្រីការបរទេសចិនបាននិយាយសម្ដីខ្លាំងៗ និងចោទប្រកាន់ទៅកាន់អាមេរិកដោយបើកចំហរថា ព្យាយាមរារាំងកំណើនសេដ្ឋកិច្ច និងគាបសង្កត់មកលើខ្លួន។
ខុសប្លែកពីថ្នាក់ដឹកនាំ និងរដ្ឋមន្ត្រីការបរទេស នាយករដ្ឋមន្ត្រីចិនថ្មី Li Qiang បែរជាខិតខំនិយាយល្អៗពីអាមេរិក និងព្យាយាមផ្សះផ្សាទំនាក់ទំនងរវាងប្រទេសទាំង ២ ឲ្យវិលមករកសភាពដើមវិញ ។ នេះបើតាមការចុះផ្សាយពី CNA។
“ក្នុងរយៈពេលប៉ុន្មានឆ្នាំចុងក្រោយនេះ មនុស្សមួយចំនួននៅសហរដ្ឋអាមេរិក បាននឹងកំពុងចាប់ផ្តើមគំនិត នៃការផ្តាច់ទំនាក់ទំនងជាមួយប្រទេសចិន ហើយពេលខ្លះវាអាចក្លាយជាប្រធានបទក្តៅគគុកនៅក្នុងប្រព័ន្ធផ្សព្វផ្សាយ។ ប៉ុន្តែខ្ញុំឆ្ងល់ថា តើមនុស្សប៉ុន្មាននាក់ដែលអាចទទួលបានប្រយោជន៍ពីការបំផ្លើសបែបនេះ”។ នេះបើតាមសម្ដីលោក Li បានលើកឡើង ចំពោះសំណួរតែមួយគត់ទាក់ទងនឹងកិច្ចការបរទេស។
លោកបន្ថែមទៀតថា៖ “ចិន និងអាមេរិក កំពុងមានទំនាក់ទំនងសេដ្ឋកិច្ចយ៉ាងជិតស្និទ្ធ និងទទួលបានផលប្រយោជន៍ទាំងសងខាងពីការអភិវឌ្ឍន៍ប្រទេសរៀងៗខ្លួន។ ដូច្នេះការគាបសង្កត់ និងពាក់មុខយក្សដាក់គ្នា មិនមែនជារឿងដែលប្រទេសទាំង២ គួរយកចិត្តទុកដាក់ឡើយ”៕
