ប្រធានាធិបតីចិន ស៊ី ជិនពីង បានអញ្ជើញសម្ព័ន្ធមិត្តត្បូងពេជ្រប្រធានាធិបតីរុស្ស៊ី វ៉្លាឌីមៀរ ពូទីន សម្រាប់ការធ្វើទស្សនកិច្ចទៅកាន់ប្រទេសចិនវិញម្ដងនាឆ្នាំនេះ។ នេះបើតាមការចុះផ្សាយពីសារព័ត៌មាននៅរុស្ស៊ីមួយចំនួន។
ដោយឡែក សម្រាប់ដំណើរទស្សនកិច្ចថ្ងៃទី ០២ នេះផងដែរ លោក ស៊ី ក៏បានអញ្ជើញទៅជួបសំណេះសំណាលជាមួយនាយករដ្ឋមន្ត្រីរុស្ស៊ី Mikhail Mishustin នៅឯ Government House ដោយជជែកគ្នាពីចំណងមិត្តភាពចិន និងរុស្ស៊ី។
“កាលពីម្សិលមិញ ខ្ញុំបានអញ្ជើញប្រធានាធិបតីពូទីន ទៅទស្សនកិច្ចនៅប្រទេសចិននាឆ្នាំនេះ ពេលណាក៏បានឲ្យតែគាត់គិតថាសក្ដិសម”។ នេះបើតាមសម្ដីមេដឹកនាំចិន និយាយទៅកាន់នាយករដ្ឋមន្ត្រីរុស្ស៊ី។
បន្ថែមពីនោះ លោក ស៊ី ក៏សង្កត់ធ្ងន់ថា រដ្ឋាភិបាលក្រុងប៉េកាំង និងមូស្គូ គឺជាមិត្តល្អនឹងគ្នា និងជាដៃគូគ្រប់យុទ្ធសាស្ត្រ ខណៈលោកនឹងផ្ដល់ “អាទិភាព” ទៅលើទំនាក់ទំនងជាមួយលោកពូទីនជានិច្ច៕
